ئێران و نێردەی یونامی لە عێراق: پێویستە ڕێگری لە پشێوی ئەمنی ناوچەکەدا  بکرێت

ئاڤا نیوز

 

وەزیری دەرەوەی ئێران و سەرۆکی نێردەی یونامی لە عێراق کۆبوونەوە و دەڵێن، پێویستە ڕێگری لە پشێوی ئەمنیی و تێکچوونی دۆخی ئارامی ناوچەکە بکرێت.

 

ئەوەی پێویستە بیزانیت: کۆتایی ساڵی داهاتوو ئەرکەکانی نێردەی نەتەوە یەکگرتووەکان لە عێراق (یونامی) کۆتاییان دێت، بەرپرسانی یونامیش دەیانەوێت لەکاتێکدا عێراق جێبهێڵن کە وڵاتەکە هیچ کێشە و پێشوییەکی ئەمنیی و سیاسیی نەبێت، بۆیەش هەوڵەکانیان بۆ دوورخستنەوەی عێراق لە گرژییەکانی ناوچەکە چڕکردووەتەوە.

 

ڕاگەیێنراوی فەرمی: ئاژانسی فەرمی ئێران بڵاویکردەوە، لە کۆبوونەوەی نێوان عەباس عێراقچی، وەزیری دەرەوەی ئێران و د. محەمەد ئەلحەسان، نوێنەری تایبەتی سکرتێری گشتی نەتەوە یەکگرتووەکان بۆ عێراق کە لە تاران بەڕێوەچوو، هەردوولا جەختیانکردەوە لەسەر ڕێگریکردن لە تێکچوونی دۆخی ئاسایش و ئارامی ناوچەکە، داواشیانکرد بۆ ڕێگری لە پشێوی ئەمنی لە ناوچەکە، هاوکاریی لەنێوان وڵاتاندا هەبێت.

 

لەلایەکی دیکەوە: لەبارەی کۆبوونەوەی نوێنەری سکرتێری نەتەوە یەکگرتووەکان لە عێراق لەگەڵ بەرپرسانی ئێران، نوێنەرایەتیی یونامی ئەوەی خستووەتەڕوو، کۆبوونەوەکە لە چوارچێوەی هەوڵەکانیان بووە بۆ ئاسانکردنی گفتوگۆ و هاوکاری لەنێوان وڵاتانی ناوچەکە، هاوکات بارودۆخی ناوچەکەش گفتوگۆی لەسەر کراوە.