ئاڤا دەنگی گوندنشینانی سنووری چەمچەماڵ بە لایەنی پەیوەندیدار دەگەیێنێت

ئاڤا نیوز

نەبوونی پرۆژە خزمەتگوزارییەکانی ئاو و کارەبا و ڕێگاوبان، دانیشتووانی چەند گوندێکی سنووری چەمچەماڵی نیگەران کردووە و داوا دەکەن ئاڤا دەنگیان بگەیێنێت. 

وێنە گەورەکە: لە سنووری قەزای چەمچەماڵ 440 گوند لە سەردەمی ڕژێمی پێشوو وێرانکراون، زۆرینەی کەسوکاری ئەنفالکراوان دانیشتووی ئەو دەڤەرەن و ژمارەیەکیان کێشەی نەبوونی ئاو و کارەبا و ڕێگاوبانیان هەیە، بەتایبەت گوندەکانی: وەستا خدر، چنگی، قایتەوەن، قەشقە و وێڵە و چەندین گوندی دیکە. 

داواکاریی خەڵک: هاونیشتمانییەک لە یەکێک لە گوندەکانی سنووری ناحییەی قادرکەرەم لە قەزای چەمچەماڵ، لە کۆمێنتێک بۆ ئاڤا نووسیویەتی: 'گوندەکەم نزیکی کێڵگەی کۆرومۆرە و بۆڕی غازی پێدا تێدەپەڕێت، بەڵام لە پڕۆژە خزمەتگوزارییەکانی ئاو و کارەبا و ڕێگاوبان بێبەشین'، داوای لە ئاڤا کرد بەدواداچوون بۆ کێشەکانیان بکات.

لێدوانی فەرمی: ڕەمک ڕەمەزان، قایمقامی چەمچەماڵ لەوبارەیەوە بە ئاڤا میدیای ڕاگەیاند: "هیچ گوندێک نییە داواکاری پێشکەش کردبێت و کارمان بۆ نەکردبێت، لە ڕێگەی ئێوەوە داوا لەو هاونیشتمانیانە دەکەم کە پەیوەندییان بە ئێوەوە کردووە، سەردانی ناحیەکانیان بکەن و لەوێ نووسراومان بۆ بێنن، بۆ ئەوەی داواکارییەکانیان لە پلان و بەرنامەی ساڵی 2025 دابنێین و کاریان لەسەر بکەین".

قایمقامی چەمچەماڵ جەخت دەکاتەوە هەر گوندێک یەک ماڵیشی تێدا بێت پڕۆژەی پێدەگەیێنن، لە ساڵی 2018 تاوەکو ئێستا کارەبا بە 68 گوندی سنوورەکە گەیێنراوە و  پڕۆژەی ئاویشیان بۆ دابین کراوە.