شاخەوان عەبدوڵڵا: نووسراوە شۆڤێنییەكەی وەزارەتی خوێندنی باڵای عێراق هەڵوەشایەوە

ئاڤا نیوز

 

لەسەر نووسراوێكی وەزارەتی خوێندنی باڵای عێراق كە لە ناوەڕۆكەكەی لە دژی بەكارهێنانی زمانی كوردییە لە زانكۆكانی كەركووك، شاخەوان عەبدوڵڵا، جێگری سەرۆكی پەرلەمانی عێراق پەیوەندیی بە وەزیری خوێندنی باڵای عێراقەوە دەكات و وەزیریش ڕاستەوخۆ نووسراوەكە هەڵدەوەشێنێتەوە.

لێدوانی فەرمی: شاخەوان عەبدوڵڵا، جێگری سەرۆكی پەرلەمانی عێراق ڕایگەیاند: دوای ئەوەی نووسراوێکی وەزارەتی خوێندنی باڵا - بەڕێوەبەرایەتیی کارگێڕیی و لێكۆڵینەوە و پلان گەیشتە زانکۆی کەرکووک و پڕ بوو لە هەڵەی یاسایی و دەستووری و بە نەفەسێکی شۆڤێنی نووسرابوو، دەستبەجێ نووسراوێکی خێرام ئاراستەی وەزارەتی خوێندنی باڵا کرد.

 

بۆچوونی لایەنی بەرامبەر: وەزیری خوێندنی باڵای عێراق لە وەڵامی نووسراوەكەی شاخەوان عەبدوڵڵا، پەیوەندیی كردووە و ڕایگەیاندووە كە ئەو نووسراوە هەڵدەوەشێنێتەوە و بە جێگری سەرۆكی پەرلەمانی عێراقی ڕاگەیاندووە كە ئەو نووسراوە گوزارشت لە ڕای وەزارەتەكەی ناكات و زمانی کوردی فەرمییە و هیچ کەس ناتوانیت ڕێگە لە خوێندنی کوردی بگرێت.

 

لەلایەكی دیكەوە: وەزیری خوێندنی باڵا بە شاخەوان عەبدوڵڵای ڕاگەیاندووە كە پەیوەندیی بە سەرۆكی زانكۆی كەركووكەوە دەكات و فەرمانی پێدەكات، نەک کار بەو نووسراوە نەکرێت، بەڵكو تاقیکردنەوەی ئەمڕۆی قوتابییە كوردەكانی زانكۆكەش دەبێت دووبارە بكرێتەوە.