بەریتانیا و هەرێمی کوردستان تاوتوێی سنووردارکردنی کۆچی نایاسایی دەکەن

ئاڤا نیوز

 

وەزیرانی ناوخۆی حکومەتی هەرێمی کوردستان و بەریتانیا، لە پەیوەندییەکی تەلەفۆنیدا تاوتوێی پەرەپێدانی هاریکاری و هەماهەنگییەکانی نێوان هەردوولایان لە ڕووبەڕووبوونەوەی ئاڵانگارییەکانی ناوچەکە و بەرەنگاربوونەوەی تاوانی ڕێکخراو و سنووردارکردنی کۆچی نایاسایی کرد.

 

وێنە گەورەکە: ئەمڕۆ 19-12-2024، ئیڤێت کووپەر، وەزیری ناوخۆی بەریتانیا، پەیوەندی بە ڕێبەر ئەحمەد، وەزیری ناوخۆی حکومەتی هەرێمی کوردستانەوە کرد و گفتوگۆیان کرد دەربارەی چەند پرس و بابەتێکی ئەمنی پەیوەست بە ناوچەکە.

 

ڕاگەیێنراوی فەرمی: وەزارەتی ناوخۆی حکومەتی هەرێمی کوردستان ڕایگەیاندووە: لە پەیوەندییە تەلەفۆنییەکەدا پێشهاتە ئەمنییەکانی ناوچەکە، گۆڕانکارییەکانی سووریا، گرنگی پەرەپێدانی هاوکاری و هەماهەنگییەکان بۆ ڕووبەڕووبوونەوەی ئاڵانگارییەکان گفتوگۆیان لەبارەوەکرا.

 

وەزارەتی ناوخۆی هەرێمی کوردستان ڕاشیگەیاندووە، بەرەنگاربوونەوەی تاوانی ڕێکخراو و سنووردارکردنی کۆچی نایاسایی و برەودان بە کارکردنی هاوبەش لە پێناو دەستەبەرکردنی سەقامگیری و ئاسایشی ناوچەکە بەشێکی دیکەی گفتوگۆکانی نێوان هەردوو وەزیری ناوخۆی بەریتانیا و هەرێمی کوردستان بوون.

 

ئەوەی پێویستە بیزانیت: وەزیری ناوخۆی حکومەتی هەرێمی کوردستان خواستی خۆی بۆ بەهێزکردنی هاوبەشی و پتەوکردنی پەیوەندییەکانی نێوان کوردستان و بەریتانیا دووپاتکردەوە.