یاسای خانەنشینی حەشدی شەعبی دەگەڕێتەوە بۆ حکومەت

ئاڤا نیوز

 

بەمەبەستی هەموارکردنەوەی ڕەشنووسی یاسای خانەنشینی دەسەڵاتی حەشدی شەعبی جارێکی تر دیکە دەگەڕێتەوە بۆ حکومەت. 

 

وێنە گەورەکە: دوای ئەوەی هێرشی چەکدارانی داعش بۆ سەر عێراق دەستیپێکرد، بە فتوای ئاینی لە نەجەف ئەو گرووپە جیهادییە چەکدارییە دروستکرا، دواتر یاسای کۆمیسیۆنی حەشدی شەعبی بە زۆرینەی دەنگ لە 2016 پەسندکرا و هێزەکەی کرد بە هێزێکی یاسایی لە عێراق. 

 

زانیاریی بەدەستهاتوو: سەرچاوەیەک لە پەرلەمانی عێراق ئاشکرای کرد، حکومەتی عێراق یاسای خانەنشینی دەسەڵاتی حەشدی شەعبی لە پەرلەمان کشاندووەتەوە بۆ ئەوەی هەندێک بڕگە لە پڕۆژە یاساکە زیاد بکات.

 

زانیاریی زیاتر: هەر بەگوێرەی زانیارییەکانی ئەو سەرچاوەیە، کشانەوەی پڕۆژە یاساکە لەسەر ڕاسپاردە و پێشنیازی هەندێک لایەنی شیعەی نێو دەسەڵات بووە، تاوەکو چەند بڕگەیەک بۆ یاساکە زیاد بکرێت بەتایبەتی ئەو بڕگانەی پەیوەستن بە بودجە و مووچەی خانەنشینانی ئەو هێزە، ڕەنگە ساڵانە سەدان هەزار تریلیۆن زیاد بکات.

 

لەلایەکی دیکەوە: ئەو سەرچاوەیە ئاماژەی بەوە کردووە، ڕەنگە یاساکە ڕووبەڕووی ئاستەنگ ببێتەوە لە پرۆسەی پەسندکردن، ئەوەش بەهۆی دۆخی ڕێککەوتنی سیاسییەوە بۆیە ئێستا زۆربەی لایەنە شیعەکان پییان وایە ئێستا باشترین دەرفەتە بۆ پەسەندکردنی یاسای خانەنشینی حەشدی شەعبی لەبەرامبەر یاسای لێبوردنی گشتی.