لە دهۆك سەدان مین و تەقەمەنی لەناوبران

ئاڤا نیوز

تیمەکانی لەناوبردنی تەقەمەنییەکانی سەر بە دەزگای گشتیی كاروباری مین، لە پرۆسەیەكدا 530 مین و تەقەمەنییان لە سنووری پارێزگای دهۆك لەناوبرد.

وێنە گەورەكە: لە درێژەی كار و چالاكييه‌كانى لەناوبردنی مین و تەقەمەنی و پاشماوە جەنگیيەکان، ئەمڕۆ پێنجشەممە 19-12-2024، دەزگای گشتيی کاروباری مین، لە پرۆسەیەكدا لە پارێزگه‌ی دهۆک 530 مین و تەقەمەنی لەناوبرد.

ڕاگەیێنراوی فەرمی: بەڕێوەبەرایەتیی گشتیی كاروباری مین، لە بەیاننامەیەکدا کە وێنەیەکی بۆ ئاڤا نیوز ڕەوانەکردووە ڕایدەگەیەنێت، "لە درێژەی پرۆسەی پاکسازيی مین، لە سنووری پارێزگای دهۆک، سەرجەم ئەو مین و تەقەمەنیيانەی لە کێڵگەمینەکان هەڵگیرابوونەوە کە مێژووەكەیان بۆ سەردەمی ڕژێمی پێشووی عێراق دەگەڕێتەوە، لەلایەن تیمی تەقاندنەوەی بەڕێوەبەرایەتيی گشتيی کاروباری مینی دهۆکه‌وه‌، لە پرۆسەیه‌کی سەرکەوتووانەدا لەناوبران."

 

بۆچی گرنگە: پاککردنەوەی ناوچە سنوورییەکانی هەرێمی کوردستان لە کێڵگەکانی مین بە مەبەستی پاراستنی گیانی هاووڵاتیانە کە ساڵانە بەهۆی پاشماوەی مینی سەردەمی جەنگ دەیان کەس گیان لەدەست دەدەن یاخود کەمئەندام دەبن.