لە باكووری كوردستان بەفر ڕێگای هاتووچۆی نێوان 14 گوند دادەخات

ئاڤا نیوز

 

بەهۆی بارینی بەفرێكی زۆر لە ناوچە جیاجیاكانی باكووری كوردستان، ڕێگای هاتووچۆی نێوان 14 گوند پەكی كەوتووە.

 

وێنە گەورەكە: شەپۆڵێكی سەختی سەرما و سۆڵە و بەفربارین پارێزگاكانی باكووری كوردستانی گرتووەتەوە و لە زۆربەی شوێنەكان ئاستەنگی بۆ هاتووچۆی هاووڵاتیان دروستكردووە، لە هەردوو پارێزگای ئاگری و ئەردەخانیش بەهۆی زۆری ڕێژەی بەفربارین ڕێگای هاتووچۆی نێوان 14 گوند بە تەواوی داخراوە، هاوكات بەشێك لە ڕووبار و چەمەكان بەستوویەتی.

 

ڕاگەیێنراوی فەرمی: بەگوێرەی ئاژانسی هەواڵی ئەنادۆڵی توركی، سەرۆكی شارەوانی پارێزگای ئەردەخان لە باكووری كوردستان، داوای لە هاووڵاتیان كردووە بۆ كاری زۆر پێویست نەبێت، نەیەنە دەرەوە و باشترە ئەم چەند ڕۆژە لە ماڵەكانیان بمێننەوە تاوەكو تیمەكانی فریاكەوتن و ڕێگاوبان، ڕێگاوبانەكان لە بەفر پاكدەكەنەوە و بەڕووی هاتووچۆی ئۆتۆمبێلەكان دەیكەنەوە.

 

زانیاریی زیاتر: لە زۆربەی ناوچەكانی باكووری كوردستان و پارێزگاكانی دیكەی توركیا پلەكانی گەرما بۆ 15 پلەی ژێر سفری سەدی دابەزیوە، لە پارێزگاكانی ئاگری و ئەردەخان گەیشتووەتە 20 پلەی ژێر سفری سەدی.