لەبارەی ناسنامەی هێرشکارەکەی ئەڵمانیا سعودیە دەڵێت "شیعەیە و لە دین هەڵگەڕاوەیە"

ئاڤا نیوز

شانشینی سعودیە ڕایدەگەیێنێت، ئەوان پێشتر هۆشداریان بە دەسەڵاتدارانی ئەڵمانیا لەبارەی ناسنامەی هێرشبەرەکەوە داوە، بەو پێیەی ئەو نەیارێکی بەڕەچەڵەک شیعەیە و هەڵگەڕاوەیە لە ئیسلام.

 

وێنە گەورەکە: ئێوارەی ڕۆژی هەینی 20-12-2024، ئۆتۆمبێلێک لە شاری ماگدێبۆرگ لە باکووری ئەڵمانیا خۆی بە نێو بازاڕێکی تایبەت بە کریسمسدا کێشا و  بەهۆیەوە 11 کەس گیانیان لەدەستدا و 80 کەسی دیکەش بریندابوون.

 

چی روویدا: دوای هێرشەکە هێزە ئەمنییەکان لە شاری ماگدێبۆرگ بکەری هێرشەکەیان بە ناوی تاڵب جەواد حوسێن دەستگیرکرد کە پزیشکێکی پسپۆڕی چارەسەری دەروونییە و لە بنەڕەتدا خەڵکی سعودیەیەو لە ساڵی 2006وە لە ئەڵمانیا نیشتەجێیە.

 

زانیاریی بەدەستهاتوو: بەپێی گۆڤاری "دێر شپیگل"ی ئەڵمانی، تۆمەتبار هاوسۆزی بیرۆکەکانی پارتی بەدیل بۆ ئەڵمانیای ڕاستڕەوی تووندڕەو بووە، بەبێ ئەوەی ئاماژە بە سەرچاوەی ئەو زانیاریانە بکات.

 

ئەوەی لەبارەیەوە دەگوترێت: ئاژانسی ڕۆیتەرز لە زاری سەرچاوەیەکی سعودییەوە ڕایگەیاند، شانشینی سعودیە هۆشداریان داوە بە دەسەڵاتدارانی ئەڵمانیا لەبارەی هێرشبەرەکەوە، بەو پێیەی ئەو نەیارێکی بەڕەچەڵەک شیعەیە بۆ ڕژێمی سعودیە، لە ئیسلام هەڵگەڕاوەتەوە لەسەر پلاتفۆرمی “X”یش وەک مولحیدێک خۆی دەرخستووە، پەنابەری سیاسی لە ئەڵمانیا بەدەستهێناوە.

 

کاریگەریی و لێکەوتەکان: ئەم ڕووداوە کاردانەوەی لەسەر ئاستی نێودەوڵەتیی لێکەوتەوە، هەر یەک لە فەرەنسا، سعودیە، عێراق، ویلایەتە یەکگرتووەکانی ئەمریکا و چەندین وڵاتی دیکە سەرکۆنەی هێرشەکەیان کرد.