هەواڵگریی ئەسەد ناوی نوێژخوێنانی لە سەردەمی دەسەڵاتەکەی تۆمارکردووە

ئاڤا نیوز

 
ئۆپۆزسیۆنى سووریا دەست بەسەر تۆمارێکدا دەگرێت کە لەلایەن دەزگای هەواڵگریى سەردەمی دەسەڵاتی بەشار ئەسەدەوە ئامادەکراوە و ناوى ئەو کەسانەی تێکدا تۆمارکراوە کە بۆ نوێژى بەیانى چوونەتە مزگەوت.

 

وێنە گەورەكە: دوای هەڵاتنی بەشار ئەسەد و ڕووخانی حکومەتەکەی لە 8-12-2024، پەردە لەسەر بەشێك لە تاوان و بەڵگەنامە هەواڵگرییەكان و دۆسیە ئەمنییەكانی 53 ساڵی فەرمانڕەوایی بنەماڵەی ئەسەد لادرا، بەتایبەت كەیسی زیندانە نهێنییەكانی سیدنایا و سیخوڕیكردن بەسەر ژیانی تایبەتی هاووڵاتییان و كارمەندانی دەوڵەت.

 

بڵاوکراوەی فەرمی: بەگوێرەی میدیا عەرەبییەكان، لەچوارچێوەی زنجیرەی ئاشكراكردنی بەڵگەنامە هەواڵگرییەكان و دۆسییە ئەمنییەکانی حكومەتی ڕووخاوی سووریا، تۆمارێک بەردەستی ئۆپۆزسیۆنی سووریا كەوتووە كە لەلایەن هەواڵگریی بەشار ئەسەدەوە ئامادەكراوە و ناوی ئەو كەسانەی تێدایە كە هاتووچۆی مزگەوتیان كردووە، بەتایبەت ئەو گەنجانەی چوونەتە نوێژی بەیانی.

 

زانیاریی زیاتر: زنجیرەی دۆزینەوەی بەڵگەنامە هەواڵگرییەكانی حكومەتی پێشووی سووریا لە میدیا عەرەبیەكان بە "وێنەكانی قەیسەر" ناونراون، تێیدا ژمارەیەك دۆسیەی تاوانكاری، گەندەڵی و سیخوڕیكردن لەخۆدەگرێت، كە گوزارشت لە دڕندەیی حكومەتی ڕووخاوی سووریا دەكات. لەلایەن ئوسامە عوسمان، سەرۆكی ڕێكخراوی دۆسیەكانی قەیسەڕ بڵاودەكرێنەوە كە بە یەكێك لە ڕكابەرە سەرسەختەكانی سیستمی حكومڕانی پێشووی سووریا ئەژمار دەكرێت.