باڵیۆزی یەکێتیی ئەوروپا لە عێراق: ڕێککارەکانی پێدانی ڤیزا بۆ دوو توێژ ئاسان دەکەین

ئاڤا نیوز

 

هەرچەندە ناوەڕاستی ساڵی ڕابردوو یەکێتیی ئەوروپا بڕیاریدا ڕێکارەکانی پێدانی ڤیزا بکاتە ئۆنلاین، ئەوەش بۆ ئەوەی ڕێککارەکان ئاسانتر، هەرزانتر و خێراتر بکرێن، بەڵام تائێستاش ڕێککارەکانی وەرگرتنی ڤیزای شنگن بۆ هاووڵاتییانی عێراق و هەرێمی کوردستان قورسن و بە زەحمەت دەتوانن سەردانی وڵاتانی یەکێتییەکە بکەن.

 

لێدوانی فەرمی: تۆماس زایلەر، باڵیۆزی یەکێتیی ئەوروپا لە عێراق بە ڕۆژنامەی سەباحی نیمچەی فەرمی ڕاگەیاندووە، یەکێک لە سیاسەتە سەرەکییەکانیان ئەوەیە ساڵی 2025 ئاڵوگۆڕی بازرگانیی و وەبەرهێنان لە عێراق زیاتر بکرێت، هاوکات چالاکانەش لەگەڵ عێراق و تورکیا کاردەکەن بۆ ئەوەی پرۆژەی ڕێگای گەشەپێدان بە باشترین شێوە و بەبەشداری هەرێمی کوردستان جێبەجێ بکرێت.

 

پەیوەست بە ئاسانکاری ڕێکارەنی پێدانی ڤیزای شنگنیش بە هاووڵاتییانی عێراق و هەرێمی کوردستان، باڵیۆزی یەکێتیی ئەوروپا دەڵێت، "ئەوە لە تایبەتمەندی هەر 27 وڵاتەکەی یەکێتیی ئەوروپایە و ئەوانیش دەزانن کە لە دۆخی ئەمنی وڵاتەکەدا بەرەوپێشچوونێکی ئەرێنی هاتووەتەوە ئاراوە، بۆیە ئێمە لەگەڵ ئەو وڵاتانە کاردەکەین بۆ ئەوەی بزانین چۆن ڕێککارەکانی گەشتی هاووڵاتییانی عێراق بۆ ئەوروپا ئاسانتر بکرێت، بەتایبەتیش ئەوە سەردانانەی کە پەیوەندییان بە ئابووری و ئاڵوگۆڕی زانستییەوە هەیە".

 

لەلایەکی دیکەوە: لەبارەی گرژییەکانی ناوچەکەش، تۆماس زایلەر، باڵیۆزی یەکێتیی ئەوروپا لە عێراق ڕایگەیاند، یەکێتیی ئەوروپا لەگەڵ حکومەتی عێراق بۆ ڕووبەڕووبوونەوەی ئاستەنگییەکان بەتایبەت دۆخی سووریا گفتوگۆی بەردەوامیان هەیە، هاوکات یەکێتیی ئەوروپا ستایشی هەڵوێستەکانی حکومەتی عێراق بۆ هێورکردنەوەی دۆخی ناوچەکە دەکات.