کارمەندانی نەخۆشخانەیەکی دهۆک حەوت مووچە بەیەکەوە وەردەگرن

ئاڤا نیوز

 

دەیان کارمەندی گرێبەستی نەخۆشخانەی فریاکەوتنی ئازادی دهۆک ماوەی حەوت مانگە هیچ مووچەیەکیان وەرنەگرتووە. دوای ئەوەی ئاڤا میدیا بەدواداچوونی بۆ کێشەکەیان کرد، وەزیری تەندروستی هەر لە ڕێگەی ئاڤاوە موژدەی پێدانی حەوت مووچەی بەیەکەوە پێدان.

وێنە گەورەکە: دکتۆر سامان بەرزنجی، وەزیری تەندروستی حکومەتی هەرێمی کوردستان لە ڕێگەی تەلەفۆنەوە میوانی بەرنامەی "ڕابن ژ خەوێ"ی ئاڤا بەهدینان بوو، چەندین کێشەی خەڵکی پێگەیێنرا و لە بارەی کێشەی مووچەی حەوت مانگی کارمەندانی گرێبەستی نەخۆشخانەی فریاکەوتنی ئازادی دهۆک مژدەیەکی دا.

لێدوانی فەرمی: د.کتۆر سامان بەرزنجی بە ئاڤا میدیای ڕاگەیاند: ئەو کارمەندانە دڵنیادەکەمەوە کە مووچەی حەوت مانگەکەیان نافەوتێت و ئێستا سەرقاڵی چارەسەرکردنی کێشەکەن و لە هەوڵدان ئەم مانگە حەوت مووچە بەیەکەوە پێیان بدرێت.

ئەوەی پێویستە بیزانیت: ئەو کارمەندانە ژمارەیان 100 کەسە و لە مانگی پێنجەوە مووچەیان وەرنەگرتووە، پێشتریش داوایان لە ئاڤا میدیا کردبوو بۆ ئەوەی دەنگیان بگەیێنرێت. وەزیری تەندروستیش دەڵێت "لەو کاتەوە لەگەڵ وەزارەتی دارایی عێراق لەسەر خەت بووین بۆئەوەی ڕێکارەکانیان تەواو بکرێت و مووچەیان بۆ ببەسترێت، کێشەکە چارەسەر بووە و ئەم مانگە حەوت مووچە پێکەوە وەردەگرن".100 کارمەندی گرێبەستی تەندروستی نەخۆشخانەی فریاکەوتنی دهۆک لە مانگی پێنجەوە هیچ مووچەیەکیان وەرنەگرتووە