لیرەی سووری لەبەرامبەر دیناری عێراقیدا بەهاکەی زیاتر لەدەست دەدات

ئاڤا نیوز

 

لە بازاڕەکانی دراوی هەرێمی کوردستان لیرەی سووری هاڕەکەی کردووە، شارەزایانیش داوا لە خەڵک دەکەن خۆیان لە مامەڵەکردن پێی بەدووربگرن و پێشبینی دەکەن زیاتر دابەزێت.

وێنە گەورەکە: لەدوای ڕووخانی حکومەتی بەشار ئەسەد لە هەشتی ئەم مانگە، بەهای لیرە لە بازاڕەکانی کوردستان بەخێرایی بەرزبووە، بەڵام دوای تێپەڕبوونی دوو هەفتە 58%ی بەهاکەی لەدەست داوە.

لێدوانە فەرمییەکان: غازی جەعفەر لە ئەنجوومەنی بازاڕی دراوفرۆشانی هەولێر بە ئاڤا نیوزی وت: "یەک ملیۆن لیرە لەنێوان 180 بۆ 295 هەزار دینارە، جیاوازییەکەش بەهۆی جۆری لیرەیە، دوو هەزاری و پێنج هەزاری و شەدەکانی ناو نایلۆن بەهایان جیاوازە".

هاوکات جەبار گۆران لە ئەنجوومەنی بازاڕی دۆلارەکەی سلێمانی بە ئاڤای وت: "هۆکاری بەرزبوونەوەی لیرەی سووری ناسروشتی بوو. ئەوەی لیرەی هەبووبێت و تا ئێستا نەیفرۆشتبێت زیانێکی زۆر دەکات". 

هۆکارە زانراوەکان: ئەم دابەزینە خێرایە بەهۆی زۆربوونی لیرەیە لە بازاڕ، غازی جەعفەر دەڵێت: "لیرەیەکی زۆری سووری لە ئێرانەوە ڕەوانە دەکرێت، هەمووی لەناو کارتۆنە و بە نایلۆن کەپس کراوە، بەڵام ئاممان نەیکڕن". لیرەی سووری ئەگەر بە نایلۆن کەپس کرابێت گرانترە لەوەی فەل بێت.


ئەمەش بزانە: لە بازاڕی سلێمانی کەسی وا هەیە بە بەهای 100 ملیۆن دیناری عێراقی لیرەی کڕیوە، هەر ملیۆنێک لیرە بە 640 هەزار دینار لەسەری وەستاوە، ئێستا ئەگەر بە 250 هەزار بیفرۆشێت،  زیاتر لە 60 ملیۆنی زەرەر دەکات.