بەهۆی دووبارە کردنەوەی پاڵاوگەیەک لە هەولێر 14 کرێکار و خاوەنی پاڵاوگەکە دەستگیر دەکرێن

ئاڤا نیوز

 

لە دوو هەفتەی ڕابردوودا لە سنووری پارێزگای هەولێر زیاتر لە 50 پاڵاوگەی نایاسایی داخراون. خاوەن پاڵاوگەیەکیش دوای کردنەوەی پاڵاوگەکەی و پابەند نەبوون بە بڕیارەکەوە لەگەڵ 14 کرێکار دەستگیر دەکرێت.

 

وێنە گەورەكە: لەماوەی ڕابردوودا بەمەبەستی پاككردنەوەی ژینگە و هەوای هەولێر لە دووكەڵی ڕەشی كارگە و پاڵاوگە نایاساییەکان، پارێزگاری هەولێر بڕیارێكی حەوت خاڵی ڕاگەیاند؛ یەكێك لە خاڵەكان داخستنی كارگە و پاڵاوگە نایاساییەكان بوو لە سنووری پارێزگای هەولێر.

 

لێدوانی فەرمی: نەبەز عەبدولحەمید، قایمقامی قەزای ناوەندیی هەولێر بە ئاڤا میدیای ڕاگەیاند: "سەڕەڕای وەرگرتنی بەڵێننامە لە خاوەنی پاڵاوگە نایاساییەکان کە پابەندبن بە بڕیاری داخستنی شوێنەکانیانەوە، بەڵام پاڵاوگەیەک بەبێ مۆڵەت دووبارە دەستی بەکارکردن کردبووەوە، دوای بەدواداچوونەکانەکان، خاوەنی پاڵاوگەکە و 14 کرێکار کە لەو شوێنە کاریان دەکرد دەستگیرکران.

 

زانیاریی زیاتر: لەسەر بڕیاری قایمقامی قەزای ناوەندیی هەولێر و بە بریاری دادگای لێکۆڵینەوەی هەولێر، بەپێی ماددەی 5ی بەرەنگاربوونەوەی بە قاچاخبردنی نەوت و بەرهەمەکانی، ئەو خاوەن پاڵاوگەیە و کرێکارەکانی ڕاگیراون و پەڕاوییان بۆ کراوەتەوە و ڕەوانەی بەردەم دادوەر کراون.