ئەمریکا هێزێکی زۆری سەربازی لە کۆبانێ جێگیر کرد

ئاڤا نیوز

 

بەهۆی بارودۆخی ئەم دواییەی سووریا و هەڕەشەکانی گرووپە چەکدارەکانی نزیک لە توورکیا بۆ سەر کۆبانێ، ئەمریکا هێزێکی زۆری سەربازی لەو شارە جێگیر کرد.

 

وێنە گەورەکە: دوای زیادبوونی مەترسییەکان و هێرشی بەردەوامی گرووپە چەکدارەکانی نزیک لە تورکیا بۆ سەر کۆبانێ، ئەمریکا هێزێکی سەربازی بە چەکی قورس و ئۆتۆمبێلی سەربازییەوە لە شارەکە جێگیر کردووە. 

 

لێدوانی فەرمی: ڕوکەن جەمال، وتەبێژی یەکینەکانی یەپەژە کە گرووپێکی سەر بە هەسەدەیە، بە ئاڤا نیوزی ڕاگەیاند: ئەمریکامان ئاگادار کردووەتەوە کە چیتر دەستەوەستان نابین لە بەرامبەر هێرش و پێشێلکارییەکانی گرووپە چەکدارەکان و خودی سەربازانی تورکیا، "بە ئەمریکامان گوتووە ئەگەر بە کردار لەبەرامبەر هێرشەکان هەڵوێست وەرنەگرن، ئەوا چاوەڕێی وڵام بن".

 

وتەبێژەکەی یەپەژە باسی ئەوە دەکات: "لە سەردەمی داعش کۆبانێمان ڕادەست نەکردووە، ئێستا چۆن بۆ ئەم گرووپانە چۆڵی دەکەین. "دوای ئەم پەیامەی ئێمە، ئەمریکا یەکسەر هێزێکی خۆی هێنایە کۆبانێ". 

 

باکگراوند: هەفتەی ڕابردوو پات رایدەر، وتەبێژی وەزارەتی بەرگریی ئەمریکا (پنتاگۆن) ڕایگەیاند: دوای ڕووخانی حکومەتی بەشار ئەسەد ژمارەی سەربازەکانمان لە سووریا لە 900 سەربازەوە بۆ دوو هەزار سەرباز زیاد کردووە، ئەمەش بەهۆی بارودۆخی ئەمدواییەی سووریا.