هەسەدە لە كانتۆنی فورات داوای چۆڵكردنی گرێ سپی و سەرێ كانی دەكات

ئاڤا نیوز

 

بەشێك لە ميدياكانى ڕۆژئاوای كوردستان بانگەوازێكی هێزەكانی سووریای دیموكرات لە كانتۆنی فورات بڵاودەكەنەوە كە تێیدا داوای ڕزگاركردنی ناوچەكانی گرێ سپی و سەرێ كانی دەكەن لە چنگی داگیركاریی توركیا و هێزەكانی سەر بەو وڵاتە.

 

ڕاگەیێنراوی فەرمی: بەگوێرەی ئاژانسی هەواڵی هاوار 'AHNA' و 'رۆناهی' كە دوو میدیای نزیك لە هەسەدەن، ڕاگەیێنراوێكی 'هێزەكانی سووریای دیموكراتی'ـیان بڵاوكردووەتەوە و تێیدا هاتووە، بانگەوازی دانیشتووانی ناوچەكانی گرێ سپی و سەرێ كانی دەكەن بۆ ڕووبەڕووبوونەوەی داگیركاری لەپێناو گەڕاندنەوەی هەزاران خانەوادەی ئەو دوو شارە بۆ زێدی خۆیان، بۆ ئەم مەبەستەش ماوەی 5 ڕۆژ دیاریكراوە بۆ چۆڵكردنی دەوروبەری بنكە و بارەگاكانی چەكدارانی سەر بە توركیا لەو ناوچانەدا.

 

لە ڕاگەیێنراوەكەی هەسەدە لە كانتۆنی فوراتدا ئاماژە بەوەشكراوە، تورکیا ناوچەكانی باکووری سووریای کردووەتە قەڵەمڕەوی تیرۆر و هەڕەشە بۆ سەر تەواوی ناوچەکانی سووریا.