ژنێک لە هەرێمی کوردستان درێژترین ماوەی لە زیندان بەڕێ کردووە

ئاڤا نیوز 

 

بەڕێوەبەری گشتیی چاكسازییەكانی هەرێمی كوردستان باس لە چیرۆكی ژنێک دەكات كە ئێستا لە چاكسازیی منداڵان و ژنانی هەولێرە و 32 ساڵە زیندانییە و چارەنووسی نادیارە.

 

چیرۆكی سەرەكی: لەسەر ئاستی هەرێمی كوردستان درێژترین ماوەی زیندانی كە تاوەكو ئێستا تۆمار كرابێت ژنێكە بە ناوی (ع) و لە ساڵی 1992ـەوە دەستگیر كراوە و ماوەی زیندانییەكەی 32 ساڵە و ئێستا لە چاكسازیی ژنان و منداڵانی هەولێرە و چارەنووسی نادیارە.

 

لێدوانی فەرمی: ئیحسان عەبدولرەحمان، بەڕێوەبەری گشتیی چاكسازییەكانی هەرێمی كوردستان لە میانەی بەشداریكردنی لە بەرنامەی مۆری ئاڤا ڕایگەیاند: (ع) لە ساڵی 1992 بە تاوانی تەقاندنەوەی نارنجۆكێک لەنێو كەسوكارەكەی دەستگیر كراوە كە بەهۆی ڕووداوەكەوە چەند كەسێک لە كەسوكارەكەی گیانیان لەدەست داوە و بریندار بوون.

 

ئەوەی پێویستە بیزانیت: هەر (ع) نییە كە چارەنووسی نادیارە بەڵكوو 478 كەسی دیكەش لە هەرێمی كوردستان كە سزای لەسێدارەدانیان هەیە و لە زیندانەكانن چارەنووسیان نادیارە و  دەیان ساڵە چاوەڕوانن یان لێبوردنی گشتییان بۆ دەربچێت یانیش لەسێدارە بدرێن.