هێزەکانی سووریای دیموکرات: بەنداوی تشرین لە دەستی ئێمە دایە

ئاڤا نیوز

 

دوای ئەوەی وەزارەتی بەرگریی تورکیا ڕایگەیاند، بەنداوی تشرین و ناوچەی منبج بە تەواوی لە دەستی "سوپای نیشتمانی سووریایە"، هێزەکانی سووریای دیموکرات لە ڕێگەی پارچەیەک ڤیدیۆ ئەوەیان ڕەتکردەوە.

 

وێنە گەورەکە: ڕۆژێک دوای کۆتایی هاتنی دەسەڵاتی بەشار ئەسەد لە 8-12-2024، هێزەکانی ئۆپۆزیسیۆن کە هەسەدە وەک "هێزی نزیک لە تورکیا" ناویان دەبات، هێرشێکی فراوانیان بۆ کۆبانێ و کۆمەڵێک ناوچەی ژێر دەسەڵاتی هەسەدە دەستپێکرد و تا ئێستا بەشێوەی پچڕ پچڕ بەردەوامی هەیە.

 

ڕاگەیێنراوی فەرمی: ئێوارەی ئەمڕۆ پێنجشەممە، هەژمارەکانی نزیک لە (هەسەدە) لە تیلیگرام ڤیدیۆی دوو شەڕڤانی هێزەکانی سووریای دیموکراتیان داناوە، وەک دەردەوکەوێت لەسەر بەنداوی تشرین قسە دەکەن یەکێکیان دەڵێت: ئەمڕۆ 26 مانگ، لەسەر بەنداوی تشرین ئەو هەواڵەی وەزارەتی بەرگریی تورکیا ڕەتدەکەینەوە و بەنداوەکە لەژێر دەستی ئێمە دایە.

 

لەلایەکی دیکەوە: وەزارەتی بەرگریی تورکیا ئەمڕۆ ڕایگەیاندبوو، تەواوی ناوچەی منبج و بەنداوی تشرین لە دەستی هێزەکانی سوپای نیشتمانی سووریایە.

 

ئەوەی پێویستە بیزانیت: بەنداوی تشرین دەکەوێتە ناوچەی منبج لە پارێزگای حەلەب، لەسەر ڕووباری فورات دروستکراوە، توانای گلدانەوەی یەک ملیار و 900 ملیۆن مەتر سێجا ئاوی هەیە، 80 کیلۆمەتر لە سنووری تورکیا دوورە.

 

بۆچی گرنگە: بەنداوی تشرین کارەبای هەریەکە لە ناوچەکانی منبج، کۆبانێ و چەند شوێنێکی دیکەی دوورووبەری دابین دەکات. بەڵام ئێستا بەهۆی هێرشی گرووپە چەکدارەکان لەکار کەوتووە. هەر کام لە هێزەکانی سووریای دیموکرات و هێزەکانی نزیک لە تورکیا ئەم بەنداوە کۆنترۆڵ بکات سەرچاوەی وزەی کارەبای ناوچەی دەکەوێتە ژێر دەست.