وەزارەتی سامان سرووشتییەکان بەدواداچوون بۆ ڕاپۆرتێکی ئاڤا میدیا دەکات

ئاڤا نیوز

 

دوای بەدواداچوونێکی ئاڤا میدیا بۆ دابەشکردنی بەنزینی حکومی لە بەنزینخانەکان، وەزارەتی سامانە سروشتییەکان لیژنەیەکی باڵای پێکهێناوە بەمەبەستی چاودێری کردنی پڕۆسەی دابەشکردنەکە لە سەرتاسەری هەرێمی کوردستان.

 

چیرۆکی سەرەکی: چەند ڕۆژێک بەر لە ئێستا ئاڤا گەندەڵی بەشێک لە بەنزینخانەکانی ئاشکرا کرد و دواتر لایەنی پەیوەندیدار لەسەر ئەو پرسە هاتە دەنگ، بەشێک لەو بەنزینخانانەی کە بەنزینی پاڵپشتیکراوی حکومی 750 دیناری دابەش دەکەن، بەشێک لەوانە ئەو بەنزینەیان بە نرخی بەنزینی تر فرۆشتووە و قازانجی بێشوماریان کردووە.

 

زانیاریی بەدەستهاتوو: وەزارەتی سامانە سروشتییەکان لە کۆبوونەوەی ئەمڕۆیدا بڕیاریداوە، لیژنەیەکی باڵا بەمەبەستی چاودێری کردنی پڕۆسەکە پێکبهێنێت و ڕێوشوێنی توندیش بەرامبەر سەرپێچی کاران بگرێتەبەر. 

 

لێدوانی فەرمی: سەرچاوەیەک لە وەزارەتی سامانە سرووشتییەکان بە ئاڤا میدیای ڕاگەیاند: " یەکێک لە بەنزینخانەکانمان لە هەولێر ئاشكرا کردووە کە سەرپێچی زەقی کردووە، بۆیە سزا دراوە و هەموو ئەو بەنزینەی وەری گرتووە بە پێبژاردن لەسەری هەژمار دەکرێت، جارێکی دیکەش بەنزینی  حکومی پێنادرێت.

 

سەرپێچییەکەی بریتی بووە لە دابەشنەکردنی ئەو بەنزینەی بە نرخی پاڵپشتیکراو لەلایەن حکومەتەوە پێی دراوە بە نرخی 750 دینار، تەنانەت جارێک لەو بەنزینەی حکومەت پیی داوە، یەک قەترەشی بە 750 دینار دابەش نەکردووە. هاوکات بەنزینخانەیەکی دیکەش هەر لە هەولێر لەژێر لێکۆڵینەوەدایە.