لە هەرێمی کوردستان هەوڵی سنووردارکردنی تۆڕە کۆمەڵایەتییەکان دەدرێت

ئاڤا نیوز

 

دەستەی سەربەخۆی مافەکانی مرۆڤ و لایەنە پەیوەندیدارەکان سەرقاڵی پڕۆژەیەکی هاوبەشن بۆ ڕێکخستنەوەی تۆڕە کۆمەڵایەتییەکان بە ئامانجی ڕێگری و کەمکردنەوەی تاوانە ئەلیکترۆنییەکان و پاراستنی بەها کۆمەڵایەتییەکان. 

 

وێنە گەورەکە: لەگەڵ بڵاوبوونەوەی خێرا و گەشەی زیاتر تۆڕە کۆمەڵایەتییەکان بەشێک لەبەکارهێنەرانی ئەو تۆڕە کۆمەڵایەتییانە ڕووبەڕووی توندوتیژی بوونەتەوە بەهۆی بڵاوکردنەوەی پەیامی ناڕاست و وشە و قسەی نەشیا لەلایەن کەسانێک کە حساب بۆ پاراستنی بەها ئەخلاقییەکان ناکەن، بۆ ئەو مەبەستە هەرێمی کوردستان لە هەوڵدایە ئەو بابەتە بە یاسا چارەسەر بکات. 

 

زانیاریی بەدەستهاتوو: دەستەی سەربەخۆی مافەکانی مرۆڤ بە هەماهەنگی لەگەڵ وەزارەتی گواستنەوە و گەیاندن و وەزارەتی ڕۆشنبیری و لاوان سەرقاڵی پڕۆژەیەکی هاوبەشن بۆ سنووردارکردنی بەکارهێنانی تۆڕە کۆمەڵایەتییەکان و گرتنەبەری ڕیكکاری یاسایی بەرامبەر ئەو کەسانە و لایەنانەی کە تۆڕە کۆمەڵایەتییەکان بە خراپ بەکاردەهێنن. 

 

لێدوانی فەرمی: سەرچاوەیەكی تایبەت لە دەستەی سەربەخۆی مافی مرۆڤ بە ئاڤا میدیای ڕاگەیاند، یاداشتی لێكتێگەیشتن لەنێوان دەزگای داواكاری گشتی و دەستەی سەربەخۆی مافی مرۆڤ و وەزارەتی گواستنەوە و گەیاندن هەیە، كە لەڕێگەی تۆڕەكانی پەیوەندییەوە بەكارهێنانی تۆڕە كۆمەڵایەتییەكان سنووردار بكرێت و هاوشێوەی وڵاتە پێشكەوتووەكانی جیهان، هەمووجۆرە ڤیدیۆ و وێنە و بابەتێك نەگاتە دەستی بەكارهێنەر.