كۆمەڵەی میوانخانە و چێشتخانەكانی هەولێر: ڕێگە نادەین نرخەكان بەرز بكرێنەوە

ئاڤا نیوز

 

لەگەڵ هاتنی هەزاران گەشتیار بۆ هەرێمی كوردستان و بەرزبوونەوەی خواست لەسەر هۆتێل و مۆتێل و چێشتخانەكان، فەرمانگە و لایەنە پەیوەندیدارەكان چاودێرییەكانیان بۆ ڕێگریكردن لە بەرزكردنەوەی نرخەكان چڕتر دەكەنەوە.

وێنە گەورەكە: بە هۆی سەرنجڕاكێشیی ناوچە گەشتیارییەكان ساڵانە بە بۆنەی پشووی سەری ساڵ و بۆ بەشداریكردن لە ئاهەنگەكانی سەری ساڵی زایینی هەزاران گەشتیار لە باشوور و ناوەڕاستی عێراق و دەرەوەی وڵاتەوە سەردانی هەرێمی كوردستان دەكەن و چاوەڕوان دەكرێت ئەمساڵ بە ساڵی ڕابردوو ژمارەكە زیاتر بێت.

لێدوانی فەرمی: شوكر عەزیز، جێگری سەرۆكی كۆمەڵەی میوانخانە و چێشتخانەكانی هەولێر بە ئاڤای ڕاگەیاند: لەگەڵ هاتنی هەزاران گەشتیار بۆ هەرێمی كوردستان تیمەكانمان بە هاوبەشیی بەڕێوەبەرایەتیی گەشتوگوزاری هەولێر چاودێری و بەدواداچوونەكانیان چڕتر كردووەتەوە بۆ ئەوەی ڕێگریی لە هەر سەرپێچییەك بكەن سەبارەت بە بەرزكردنەوەی نرخ و پابەندنەبوون لە ڕێنوێنییە تەندروستییەكان.

 

لەلایەكی دیكەوە: بەپێی زانیارییەكانی دەستەی گەشتوگوزاری هەرێمی كوردستان چاوەڕوان دەكرێت تەنیا بۆ ڕۆژانی پشووی سەری ساڵ زیاتر لە 200 هەزار گەشتیار سەردانی شارەكانی هەرێمی كوردستان بكەن، بەپێی گوتەی جێگری سەرۆكی كۆمەڵەی میوانخانە و چێشتخانەكانی هەولێر تاوەكو ئێستا كە چوار ڕۆژ ماوە بۆ سەری ساڵ نزیكەی 70%ی ئەو ژمارەیە تۆمار كراوە.