تیمەكانی لەناوبردنی مین و تەقەمەنییەكان پاشماوەیەكی جەنگی لەناودەبەن

ئاڤا نیوز

تیمەكانی لەناوبردنی مین و تەقەمەنی سەر بە بەڕێوەبەرایەتیی گشتیی كاروباری مین لە هەولێر بەردەوامن لە خاوێنكردنەوەی شوێنە جیا جیاكان لە پاشماوەی جەنگ و كێڵگە مینییەكان، ئەمجارەیان پاشماوەیێكی تەقەمەنی لەجۆری ڕۆگ-7 چارەسەر دەکەن.

 

ڕاگەیێنراوی فەرمی: بەگوێرەی ڕاگەیێنراوی بەڕێوەبەرایەتیی گشتیی كاروباری مین لە هەولێر، تیمەكانی لەناوبردنی تەقەمەنی دوای ئەوەی لەلایەن گروپی گەشتیارییی "كوردستان ئاوتدۆر" ئاگاداركرانەوە بە دەركەوتنی پاشماوەیێكی تەقەمەنی جەنگی لە جۆری ڕۆگ-7 لە گوندی سماقووڵی سەر بە شارۆچكەی كۆیە، بە سەرپەرشتی بەڕێوەبەریی چالاكییەكانی لەناوبردنی تەقەمەنیی نەتەقاوە و بە ئامادەبوونی چاودێریی دڵنیایی جۆری، چوونە شوێنەكە و تەقەمەنیەكەیان چارەسەر كرد.

 

بۆچی گرنگە: هەبوونی پاشماوەی تەقەمەنی جۆری (7ROG) كە لەلای هاووڵاتیان بە قازیفە ناسراوە، لە چەند ناوچەیەكی هەرێمی كوردستاندا هەن و هەبوونی لەشوێنە شاراوەكان بە نەتەقاوەیی، ڕەنگە مەترسی بۆ سەلامەتی هاووڵاتیان دروست بكات، لەو چوارچێوەیەشدا تیمەكانی لەناوبردنی سەر بە بەڕێوەبەرایەتیی كاروباری مین بەردەوامن لە دۆزینەوە و لەناوبردنی ئەوجۆرە تەقەمەنییانە.