گەشتە فڕۆکەوانییەکان هەفتەیەکی ڕەشیان بەڕێکرد

ئاڤا نیوز

 

ئەمساڵ بۆ گەشتی فڕۆکەوانی ساڵێکی باش نەبوو، لەماوەی هەفتەیەکدا شەش ڕووداوی فڕۆکەوانی تۆمار کراون و چوار ڕووداویان تەنیا ئەمڕۆ بووە.

 

وێنە گەورەکە: ئەگەرچی دەگوترێت ڕووداوەکانی فڕۆکەوانی بەراورد بە هۆکارەکانی تری گواستنەوە کەمترن، بەڵام ئامارەکان دەریدەخەن ئەمساڵ بۆ گەشتی فڕۆکەوانی ساڵێکی سەڵامەت و باش نەبووە.

 

ژمارەکان وادەڵێن: ئەمڕۆ یەکشەممە، چوار ڕووداوی فڕۆکەوانی مەدەنی تۆمارکراون بەمجۆرە بوون:

 

-    کاتژمێر 9:07ـی بەیانی ئەمڕۆ، فڕۆکەیەکی هێڵی گواستنەوەی کۆریای باشوور لەجۆری C7-2216ـی کۆمپانیای جیجۆ ئایر کەوتە خوارەوە و بەپێی دواین ئامار 179 کەس گیانیان لەدەستداوە و دوو کەسیش لە ڕووداوەکە ڕزگاریان بووە.

-    لە کەنەدا فڕۆکەیەکی هێڵی گواستنەوەی مەدەنی لە ئاسمان یەکێک لە بزوێنەرەکانی ئاگری گرت، بە ناچاری لە فڕۆکەخانەی هالیفاکسی نێودەوڵەتی لە کەنەدا نیشتەوە، لە فڕۆکەکە 80 سەرنشین هەبوون و هەموویان بە سەڵامەت دەرچوون.

-    ئەمڕۆ فڕۆکەیەکی هۆڵەندی لە جۆری بۆینگ 707-800  لە ئۆسڵۆی پایتەختی نەرویج بەهۆی کێشە لە بزوێنەرەکەی دووچاری لادان بوو لە ڕێڕەوەکەی، بەڵام هەر 182 سەرنشینەکە بەسەلامەتی ڕزگاریان بوو.

-    دواین ڕووداوی فڕۆکە ئەمڕۆ ئێوارە بوو، فڕۆکەیەکی یانەی وەرزشی ئاسمانی جەزیرەی ئیماراتی، لە کەناراوەکانی میرنشینی رائسولخەیمە لە ئیمارات کەوتەخوارەوە، فڕۆکەوان و یەکێک لە هاوکارەکانی گیانیان لەدەستدا.

 

باکگراوند: لە ڕۆژی 23ـی ئەم مانگەوە شەش ڕووداوی کەوتنەخوارەوە فڕۆکە تۆمارکراوە، بەهۆیەوە 229 کەس گیانیان لەدەستداوە. ئەو ڕووداوەی زۆرترین گفتوگۆی بەدوای خۆی هێنا، کەوتنە خوارەوەی فڕۆکەیەکی نەفەر هەڵگری ئازەبایجانی بوو لە ئاسمانی چیچان، کە بەهۆیەوە 38 کەس گیانیان لەدەستدا و ئەمریکا ڕووسیای تۆمەتبار کرد بە خستنەخوارەوەی فڕۆکەکە.