بەریتانیا ڕێگە بە گەڕانەوەی ئەسما ئەسەد نادات

ئاڤا نیوز

 

ڕۆژنامەی "دەیلی مەیل"ی بەریتانی لە زاری سەرچاوەکانی حکومەتی بەریتانیا بڵاویکردەوە، ئەسما ئەسەد- هاوسەری بەشار ئەسەد، سەرۆکی پێشووی سووریا چیتر ناتوانێت بچێتەوە وڵاتەکەی.

 

زانیاریی بەدەستهاتوو: ڕۆژنامەی دەیلی مەیلی بەریتانی بڵاویکردەوە، دۆخی تەندروستی ئەسما ئەسەد، بەهۆی تووشبوونی بە نەخۆشی شێرپەنجەی خوێنەوە بەرەو خراپتر دەڕوات و ئەگەری مانەوەی لە ژیاندا 50%ـە، بەهۆی بەسەرچوونی ماوەی پاسپۆرتەکەشیەوە ناتوانێت بچێتە بەریتانیا.

 

لێدوانی فەرمی: ئیڤێت کوپەر، وەزیری ناوخۆی بەریتانیا ڕایگەیاند: حکومەتی بەریتانیا ڕێگە بە گەڕانەوەی هاوسەرەکەی ئەسەد نادات بۆ وڵاتەکەی، چونکە ئەسما ئەسەد بەڵگەی پێویستی نییە بۆ هاتنە ناوەوەی بەریتانیا، ناکرێت تەنیا بەهۆکاری تەندروستی ڕێگەی پێبدرێت.

 

لەلایەکی دیکەوە: نووسینگەی سەرۆکوەزیرانی بەریتانیا دەڵێت، بەهۆی ئەو سزایانەی کە لە ماوەی سەرۆکایەتی ئەسەد بەسەر ئەسما دا سەپێنراون ڕێگە نادەن بگەڕێتەوە وڵاتەکەی هەرچەندە رەگەزنامەی ئەو وڵاتەی هەیە.

 

باکگراوند:  ئەسما ئەسەد، لە مانگی ئایار ڕابردوو تووشی جۆرێکی سەختی شێرپەنجەی خوێن بووە کە کاریگەری لەسەر مۆخی ئێسک هەیە، ئەسما ئەسەد پێشتر لە ساڵی 2019 دوای ساڵێک لە چارەسەر وەرگرتنی شێرپەنجەی مەمک چاکبوونەوەی لە نەخۆشییەکە ڕاگەیاند.