سەرۆک بارزانی: دەبێ وەڵامی دەنگ و داواكاریی خەڵك بدرێتەوە و هەرچی زووە حکومەت پێکبهێنرێت

ئاڤا نیوز

 

سەرۆک بارزانی داوای زوو پیکهێنانی کابینەی نوێی حکومەتی هەرێمی کوردستان دەکات و تیشک دەخاتە سەر ئەوەی دۆخی ناوچەكەمان چیتر بەرگەی كێشە و توندوتیژی و تیرۆر و توندڕۆیی و ناسەقامگیری ناگرێت.

 

وێنە گەورەکە: سەرۆک بارزانی جەخت لە زوو پێکهێنانی کابینەی نوێی حکومەتی هەرێمی کوردستان دەکاتەوە، هاوکات بەبۆنەی سەری ساڵی تازەی زایینییەوە پیرۆزبایی لە خانەوادەی شەهیدان، پێشمەرگە و هاونیشتمانیان دەکات و هیوادارە لە ساڵی تازەدا ئاشتی و پێكەوەژیان باڵ بەسەر ناوچەكەدا بكێشێت.

 

ڕاگەیێنراوی فەرمی: بەپێی ڕاگەیێنراوی بارەگای بارزانی، سەرۆک بارزانی جەخت دەکاتەوە لەوەی: "دەبێ وەڵامی دەنگ و داواكاریی خەڵكی كوردستان بدرێتەوە، ئەویش لەڕێگەی پێكهێنانی هەرچی زووتری كابینەی دەیەمی حكومەتی هەرێمی كوردستان، بۆ ئەوەی پلان و بەرنامەكانی بۆ خزمەتكردنی خەڵكی كوردستان جێبەجێ بكات".

 

زانیاریی زیاتر: پێویستە لە چوارچێوەی دەستوور و ڕێككەوتنەكان، لەڕێگەی دیالۆگ و هەماهەنگیی نێوان حكومەتی عێراقی فیدڕاڵ و حكومەتی هەرێمی كوردستان، كێشەكانی نێوان هەردوولا چارەسەر بكرێن، چیتر كۆسپ و تەگەرە بۆ مافەكانی خەڵكی كوردستان دروست نەكرێن.

 

لەلایەکی دیکەوە: لەكاتێكدا بەرەو دەستپێكی ساڵی تازە دەڕۆین كە ناوچەكەمان بە بارودۆخی هەستیاردا تێدەپەڕێت، ڕووداو و گۆڕانكارییەكانی سووریا لەگەڵ ئەوەی كاریگەریی لەسەر بارودۆخی ناوچەكەمان و هاوكێشەكان دادەنێت، لەهەمانكاتیشدا دەرفەتێكی تازەیە بۆ گەلانی سووریا کە لە ڕێگەی دیالۆگ و لەیەكتێگەیشتندا بنەمایەكی پتەو بۆ پێكەوەژیان، ئاشتی و سەقامگیریی بوونیاد بنێن. ناوچەكەمان چیتر بەرگەی كێشە، توندوتیژی، تیرۆر، توندڕۆیی و ناسەقامگیری ناگرێت، بۆیە پێویستە هەموو لایەك پشت بە زمانی دیالۆگ و لەیەكترتێگەیشتن ببەستن و لە نكۆلیكاری و دەمارگیریی نەتەوەیی و ئایینی دوور بكەونەوە. دەبێ هەموو لایەك بزانن خۆسەپاندن ئەنجامی نابێت.