بەرهەمە کشتوکاڵییەکانی هەولێر هەناردەی وڵاتانی دوو کیشوەر دەکرێن

ئاڤا نیوز

 

لە چوارچێوەی ئاسانکاری حکومەتی هەرێمی کوردستان بۆ کردنەوەی دەرگای بازاڕەکانی جیهان بەڕووی بەرهەمە خۆماڵییەکانی جووتیاران، ساڵانە سەدان تۆن سەوزە و میوە زیاتر لە 11 هەزار کیلۆمەتر لە هەولێرەوە بۆ وڵاتان هەناردە دەکرێت.

 

وێنە گەورەکە: کابینەی نۆیەمی حکومەتی هەرێمی کوردستان وەک هۆکارێک بۆ بەهێزکردنی ژێرخانی ئابووری پەرەی بە سێکتەری کشتوکاڵی لە ناوچەکانی هەرێمی کوردستان داوە، کۆڕبەند و فێستیڤاڵە جیهانییەکانی قۆستووەتەوە بۆ دۆزینەوە بازاڕێک بۆ بەرهەمی جووتیاران و ساغکردنەوەی بەرهەمەکانیان.

 

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای گوت، "ساڵی 2024 نزیکەی هەشت هەزار تۆن پەتاتە و ژمارەیەک بەرهەمی کشتوکاڵی دیکەی جووتیاران ڕەوانەی سێ وڵاتی ئاسیا و دوو وڵاتی دیکەی ئەفریقا کراون".

 

ئەوەی پێویستە بیزانیت: بەرهەمە کشتوکاڵییەکانی جووتیارانی سنووری هەولێر کە پەتاتە، هەنار، قۆخ، ترێ، باینجان، هەنجیر، کاڵەک، شووتی و چەند بەرهەمێکی دیکە دەگرێتەوە، ئەمساڵ هەزار تۆن بۆ سعوودیە، حەوت هەزار تۆن بۆ ئیمارات، 300 تۆن بۆ سووریا، باشووری ئەفریقا و لیبیریا 100 تۆن بەرهەمیان بۆ هەناردە کراون.