هەفتەی داهاتوو یەکێتی و پارتی کۆدەبنەوە

ئاڤا نیوز

 

شاندی دانوستانکاری پارتی و یەکێتی جارێکی دیکە بۆ گفتوگۆکردن سەبارەت بە پێکهێنانی کابینەی نوێ کۆدەبنەوە، دوو بەرپرسی باڵای ئەو دوو حیزبەش دەڵێن، " هەنگاوی کردەیی لەبارەی پێکهێنانی کابینەی نوێی حکومەت دەنرێت."

 

وێنە گەورەکە: تاوەکو ئێستا دوو کۆبوونەوە لەنێوان پارتی و یەکێتی بۆ پرسی پێکهێنانی حکومەت لە دەباشان و پیرمام کراوە، بەگوێرەی وتەی هەردوولایان کۆبوونەوەکان ئەرێنی بوون و هەنگاوی باشیان ناوە، بۆیە چاوەڕوان دەکرێت پێکهێنانی حکومەت زۆر نەخایەنێت.

لێدوانی فەرمی: مەحموود محەممەد، وتەبێژی پارتی دیموکراتی کوردستان، ڕایگەیاند: ڕۆژی 07-01-2025 پارتی و یەکێتی جارێکی دیکە کۆدەبنەوە و تاوتوێی هەنگاوەکانی پێکهێنانی حکومەتی نوێ دەکەن.

 

لەلایەکی دیکەوە: پۆڵا سیروان تاڵەبانی، ئەندامی ئەنجوومەنی سەرکردایەتی یەکێتی نیشتمانی کوردستان بە ئاڤا میدیای ڕاگەیاند: دوای سەری ساڵی نوێ گفتوگۆ و کۆبوونەوەکان بۆ پێکهێنانی کابینەی 10 چڕتر دەبنەوە، کۆبوونەوەکانی پێشوو ئەرێنی بوون، بۆیە لە کۆبوونەوەی داهاتوو دێنە سەر وردەکارییەکان و دەست بە هەنگاوی کردەیی دەکرێت، دۆخی ناوچەکە وا دەخوازێت هەنگاوەکانی پێکهێنانی حکومەت خێراتر بکرێت
 

ئەوەی پێویستە بیزانیت: لیژنەیەکی هاوبەش بۆ ئامادەکردنی ڕەشنووسی بەرنامەی کۆبوونەوەی حەوتی کانوونی دووەم کە بڕیارە بەڕێوەبچێت، پێکهێنراوە.