ماوەی 12 ساڵە نەخۆشخانە 291 قەرەوێڵەییەکەی ڕانیە تەواو نەکراوە

ئاڤا نیوز

 

زیاتر لە 12 ساڵە هاونیشتمانییانی دەڤەری ڕاپەرین لە چاوەڕوانی تەواوکردنی نەخۆشخانەیەکی 291 قەرەوێڵەیی دان، هاوکات ساڵی ڕابردوو گواستنەوەی نەخۆش بۆ شارەکانی هەولێر و سلێمانی سێ هێندە زیادی کردووە کە ئەمەش نیگەرانی لای هاونیشتمانییانی ئەو ناوچەیە دروستکردووە. 

 

وێنە گەورەکە: بەهۆی تەواونەکردنی نەخۆشخانەی گشتیی ڕانیە ئەو کەسانەی تووشی دۆخی تەندروستی لەناکاو دەبن و پێویستییان بە چارەسەری خێرا هەیە زۆرینەی کات لەبەر نەبوونی شوێن و پزیشکی پسپۆڕ ڕەوانەی نەخۆشخانەکانی شاری هەولێر و سلێمانی دەکرێن. 

 

زانیاریی زیاتر: بەپێی ئاماری بەشی کردە پزیشکییەکانی ڕاپەڕین، تەنیا لەماوەی ئەمساڵدا زیاتر لە 2300 چارەخواز بەمەبەستی چارەسەرکردنیان بە ئۆتۆمبێلی فریاکەوتن گوازراونەتەوە بۆ نەخۆشخانەی پارێزگاکان. 

 

ئەوەی پێویستە بیزانیت: بەهۆی نەبوونی سەنتەری چارەسەری سووتاوی و نەخۆشییەکانی دڵ و چاوەدێری چڕ، نەخۆشەکان بۆ چارەسەر گواستراونەتەوە و بەرپرسانی تەندروستی ڕاپەڕینیش دەڵێن '' پلانی وردیان داناوە بۆ کەمکردنەوەی حاڵەتەکانی ناردنی نەخۆش بۆ نەخۆشخانەی شارەکانی دیکە" .