لە ئەمریکاوە بۆ سەرۆکوەزیران بارزانی: هەمیشە پشتیوانی لە کوردستانێکی بەهێز دەکەین

ئاڤا نیوز

 

ئەندامێکی ئەنجوومەنی پیرانی ئەمریکا لە کۆبوونەوەی لەگەڵ سەرۆکوەزیران بارزانی جەختی لە پشتیوانیی ئەمریکا بۆ هەرێمی کوردستان کردەوە و ڕایگەیاند “هەمیشە پشتیوانی لە کوردستانێکی بەهێز دەکەین”.

 

وێنە گەورەکە: لە چوارچێوەی سەردانەکەی سەرۆکوەزیران بارزانی بۆ ئەمریکا، ڕۆژی پێنجشەممە 29-02-2024 لەگەڵ سێناتۆر لینزی گراهام ئەندامی ئەنجوومەنی پیرانی ئەمریکا کۆبووەوە.

 

ڕاگەیێنراوی فەرمی: سەرۆکوەزیران بارزانی لە کۆبوونەوەکەدا سوپاسی پشتیوانیی بەردەوامیی سێناتۆر گراهام و ئەمریکای لە هەرێمی کوردستان کرد و تیشکی خستە سەر دوایین گۆڕانکاری و پەرەسەندنەکانی عێراق و کێشەکانی هەرێمی کوردستان و حکومەتی فیدراڵ. 

 

لەلایەکی دیکەوە: سێناتۆر گراهام خۆشحاڵی خۆی بە سەردانی سەرۆکوەزیران بارزانی بۆ واشنتن نیشان دا و دووپاتی کردەوە کە هەمیشە پشتیوانی لە کوردستانێکی بەهێز و داوا و مافە ڕەواکانی گەلی کوردستان دەکات، بەتایبەتی پاراستنی ئاسایش و سەقامگیری و دابینکردنی ماف و شایستە داراییەکان و بەشە بودجەی هەرێمی کوردستان و دەستپێکردنەوەی هەناردەکردنی نەوت و ڕێزگرتن لە قەوارەی دەستووریی هەرێمی کوردستان .