ئاڤا بەدواداچوون بۆ کێشەی مووچە و زەوی ڕزگاربووانی ئەنفال دەکات

ئاڤا نیوز

 

ئاڤا بەدواداچوون بۆ نەبەستانی مووچەی ڕزگاربووانی ئەنفال لە هەڵەبجە دەکات و نوێنەری ڕزگاربوانی ئەنفال لە هەڵەبجە، بە ئاڤا میدیای ڕاگەیاند: لە 2014 بە بیانووی قەیرانی دارایی و شەڕی داعش مووچەی هەزار ڕزگاربووەکەی ئەنفال نەبەستراوە. 

 

وێنە گەورەکە: هەزار و 248 ڕزگاربووی ئەنفال لە پارێزگای هەڵەبجە هەیە، تاوەکو ئێستا تەنیا 248 کەسیان مووچەی مانگانەی 250 هەزار دینار وەردەگرن، هەروەها 621 ڕزگاربووش تاوەکو ئیستا زەویان پێنەدراوە.

لێدوانە فەرمییەکان: شێرزاد ستار، نوێنەری ڕزگاربوانی ئەنفال لە هەڵەبجە، بە ئاڤا میدیای ڕاگەیاند: لە 2014 بە بیانووی قەیرانی دارایی و شەڕی داعش مووچەی هەزار ڕزگاربووەکەی ئەنفال نەبەسترا، لەم دوایەدا سەردانی وەزارەتەکانی دارایی و کاروباری شەهیدان و ئەنفال و ئەنجوومەنی وەزیرانمان کرد، هەموو نووسراوێک لەوبارەیەوە کرا و سەرۆکوەزیران مەسرور بارزانی واژۆی کرد، پێیان وتین ناوەکان تێکەڵی زیندانیانی سیاسیی کراوە و لە 1-1-2025 مووچەکان دەبەسترێن، تاوەکو ئێستا دەنگیان نییە.

سەرچاوەیەکی باڵا و ئاگادار لە وەزارەتی کاروباری شەهیدان و ئەنفالکراوان، بە ئاڤا میدیای ڕاگەیاند: ڕزگاربوانی ئەنفال وەکو زیندانیانی سیاسی وەجبەن، وەجبەکانی نۆ تاوەکو 15سەرجەم ڕێکارەکانیان لە وەزارەتی دارایی و بەڕێوەبەرایەتی گشتیی بودجە تەواو کراوە، بۆ ئەوەی ساڵی 2025 لەگەڵ وەزارەتی دارایی عێراق لە بودجە تەخسیسیان بۆ بکرێت و مووچەیان بۆ دیاری بکرێت، ئێمەش چاوەڕوانی وەزارەتی دارایی و ئابوورین.

 

 سەرچاوەیەکی باڵا لە وەزارەتی دارایی و ئابووری حکومەتی هەرێمی کوردستان، بە ئاڤا میدیای گوت: نووسراوەکە ئاراستەی بەغدا کراوە، ئەم نووسراوە و ئەوانی دیکەش نوێنەرەکەمان لە کاتی گفتوگۆی هەموارکردنەوەی بودجە کار بۆ جێگیرکردنیان دەکات.

 

ئەوەش بزانە: سەربەست مەولود، بەرپرسی بەشی یاسایی لە وەزارەتی شارەوانی و گەشتوگوزار دەڵێت، نووسراوەکەیانم  کردووە بە نووسراو بۆ ئەنجوومەنی وەزیران.

 

لە ڕۆژی 23-10-2024 ئەنجوومەنی وەزیران وەڵامیان دامەوە، کە ڕەزامەندن بە گۆڕینی 220 ناو، نووسراوەکە گشتاندنی بۆ شارەوانییەکان پێکراوە تاوەکو کاری لەسەر بکەن.

سەربەست مەولود، گوتیشی: دیارە ئەم بەباتە تێكەڵ کراوە، ئەو نووسراوەی بە 621 کەسەکە دراوە، لەگەڵ نووسراوێکی دیکە تێكەڵ کراوە، ئێمە لیژنەیەکمان هەیە، کە بەرپرسی ئیدارییەکان سەرپەرەشتی دەکەن و شارەوانییەکان تێیدا ئەندامن، پێویستە سەردانی ئەم لیژنەیە بکەن، دواتر بابەتەکەیان ئاراستەی ئێمە دەکرێت و بەدواداچوونی بۆ کێشەکەیان دەکەین تاوەکو چارەسەر بکرێت.