لە هەڵەبجە و دەوروبەری ئاسایش و پۆلیسی هاتووچۆ هەڵمەتێک دەستپێدەکەن

ئاڤا نیوز

 

لە سنووری هەڵەبجە هەڵمەتێک بۆ چەند دیاردەیەکی پەیوەست بە هاتووچۆ دەکرێت و زۆرێک لە ڕووداوەکانی ساڵی ڕابردووش بەهۆی ماتۆرسکیلەوە بوون.

 

چیرۆکی سەرەکی: لە سنووری هەڵەبجە مەفرەزەکانی ئاسایش و پۆلیسی هاتووچۆ هەڵمەتێک دەستپێدەکەن بۆ کۆنترۆڵکردنی دیاردەی شۆفێری بێ مۆڵەت، ئۆتۆمبێلی جام ڕەش، بەکارهێنانی لەزگە، لێخوڕینی ماتۆڕسکێل بە شێوازی نایاسایی و نەبوونی مۆڵەتی لێخوڕین، دەستبەسەرداگرتنی ماتۆرسکیلی تۆمارنەکراو و بەکارنەهێنانی هۆیەکانی سەلامەتی لێخوڕین، ڕاگرتنیان بە شپرزەیی و نایاسایی لە ناوشار.

 

ڕاگەیێنراوی فەرمی: بەڕێوەبەرایەتیی هاتووچۆی پارێزگای هەڵەبجە ڕایگەیاند: لەم هەفتەیەوە هەڵمەتەکە دەستپێدەکات، دەریشکەوتووە دوای دیراسەکردنی وردی کۆی ڕووداوەکانی هاتووچۆ لە ساڵی ڕابردوو، هۆکاری زۆرینەی ڕووداوەکان "ماتۆڕسکێل" بوون.

لێدوانی فەرمی: عەتا بەهرام، بەڕێوەبەری گشتیی هاتووچۆی پارێزگای هەڵەبجە بە ئاڤا میدیای ڕاگەیاند: لەم هەفتەیەوە دەست بەڕێککاری یاسایی دەکەین بەرامبەر بەو کەسانە کە سەرپێچی دەکەن، هاوکات ئامانجی سەرەکیمان نەهێشتنی کاری نایاسایی و ڕێکخستنەوەی بازاڕەکانە.

ئەوەی پێویستە بیزانیت: هەڵمەتەکەی ئاسایش و پۆلیسی هاتووچۆ، ناو بازاڕی هەڵەبجە، قەزای خورماڵ، ناحییەکانی بیارە، بەمۆ و سیروان دەگرێتەوە و سەرپێچیکاران سزای یاسایی دەدرێن.