ئەمساڵ چەند پرۆژەیەکی ستراتیجی لە دهۆک جێبەجێ دەکرێن

ئاڤا نیوز

 

لە ساڵی 2024دا لە سنووری سەرۆکایەتیی شارەوانیی دهۆک، تەنیا لەنێو سەنتەری ئه‌و شاره‌، 139 پرۆژە جێبەجێکراون و ڕەزامەندیيان بۆ وەرگیراوە، ئەمساڵیش چەندین پرۆژەی دیکەی ستراتیجی جێبەجیدەکرێن.

 

ڕاگەیێنراوی فەرمی: بەگوێرەی ڕاگەیێنراوی وەزارەتی شارەوانی، ئەو پرۆژانەی ڕەزامەندیان لەسەر دراوە، 71 پرۆژەن بە گوژمەی 164 ملیار و 518 ملیۆن دینار، ئەو پرۆژانەی جێبەجێکراون یان لە قۆناغی جێبەجێکردان، 68 پرۆژەن بە گوژمەی 183 ملیار و 884 ملیۆن دینار، ئەو پرۆژانەی ڕەزامەندیان هەیە 14 پرۆژەیان لەسەر بوودجەی پارێزگا و 27 پرۆژەیان لەسەر داهاتی شارەوانیی دهۆکن، 28 پرۆژەش لەسەر پێشینەی بەردەوام جێبەجێدەکرێن.

 

زانیاریی زیاتر: ئەو پرۆژانەی جێبەجێکراون یان لە قۆناغی جێبەجێکردندان، حەوت پرۆژەیان لەسەر بوودجەی وەزارەتی شارەوانی و گەشتوگوزارن، 12 پرۆژەیان لەسەر بودجەی پارێزگا‌ی دهۆک و 47 پرۆژەشیان لەسەر داهاتی سەرۆکایەتیی شارەوانیی دهۆکە کراون.

 

لێدوانی فەرمی: بەرگەشت ئاکرەیی، وتەبێژی دەستەی وەبەرهێنانی حکومەتی هەرێمی کوردستان بە ئاڤا میدیای راگەیاند: 36 پرۆژەی وەبەرهێنان بە سەرمایەی 375 ملیۆن و 854 هەزار و 428 دۆلار لە سێکتەرە جیاوازەکانەوە مۆڵەتیان وەرگرتووە.

 

لەلایەکی دیکەوە: د.هەڤال سدیق، بەڕێوەبەری وەبەرهێنانی دهۆک بە ئاڤا میدیای ڕاگەیاند: چەند پرۆژەیەکی نوێ لە دهۆک و دەوروبەری جێبەجێدەکرێن، لەوانە دروستکردنی گۆمەڵگەیەکی نیشتەجێبوون کە یەکەمجارە خزمەتگوزارییەکانی نەخۆشخانە، قوتابخانە، پەیمانگە و چەند کەرتێکی دیکە لەخۆدەگرێت، هاوکات ناوچەیەکی پیشەسازیی لە بەردەڕەش دروست دەکرێت، لە ئاکرێ، ئامێدی و شێخان-یش چەند پرۆژەیەکی پێویست جێبەجێدەکرێن.