هەرێمی کوردستان لە ڕیزبەندی پێشەوەی ئەو وڵاتانە دایە کە کاڵا لە تورکیاوە هاوردە دەکەن

ئاڤا نیوز

 

لەسەر ئاستی وڵاتانی جیهان هەرێمی کوردستان زۆرترین مامەڵەی بازرگانی لەگەڵ تورکیا هەیە و ساڵانە بە قەبارەی زیاتر لە 12 ملیار دۆلار کاڵا و شمەک لەتورکیاوە هاوردەی هەرێمی کوردستان دەکرێت.

 

وێنە گەورەکە: لە دوای ساڵی 2005ـەوە پەیوەندییە دیبلۆماسی، سیاسیی، ئابووری و بازرگانییەکانی هەرێمی کوردستان لەگەڵ وڵاتانی جیهان زیادی کردووە و تورکیاش لە پلەی یەکەمی ئەو وڵاتانەدێت کە قەبارەیەکی گەورەی بازرگانی لەگەڵ هەرێمی کوردستان هەیە و ڕۆژ لەدوای ڕۆژی زیاتر لە گەشەسەندندایە، جگە لە دابینکردنی پێداویستییە ناوخۆییەکانیش هەرێمی کوردستان بووەتە ناوەندێکی گرنگی بازرگانیی لە هاوردەکردنی کاڵا لە تورکیاوە بۆ عێراق.

 

لێدوانی فەرمی: مستەفا شێخ عەبدولڕەحمان، سەرۆکی یەکێتیی هاوردە و ناردنکارانی هەرێمی کوردستان بە ئاڤا میدیای ڕاگەیاند، "ساڵانە قەبارەی بازرگانیی نێوان هەرێمی کوردستان و تورکیا بۆ زیاتر لە 12 ملیار دۆلار بەرزبووەتەوە، هەرێمی کوردستان لە ڕیزبەندی پێشەوەی ئەو وڵاتانە دێت کە زۆرترین کاڵا لە تورکیاوە هاوردە دەکات."

 

لەلایەکی دیکەوە: ئەمڕۆ سێشەممە سەرۆكوەزیران مەسرور بارزانی، بە سەردانێكی فەرمی گەیشتە ئەنقەرەی پایتەختی توركیا و بڕیارەكۆمەڵێك پرس لەگەڵ هەریەك لە ڕەجەب تەیب ئەردۆغان، سەرۆککۆماری توركیا و هاكان فیدان، وەزیری دەرەوە و ژمارەیەك لە بەرپرسانی باڵای دیكەی ئەو وڵاتە تاوتوێ بكات.