لە کۆبوونەوەی ئەنجوومەنی وەزیران باسی وەرگرتنی هەڵوێستی تووند بەرامبەر بە‌غدا کراوە

ئاڤا نیوز

لە کۆبوونەوەی ئەنجوومەنی وەزیرانی کوردستان باسی وەرگرتنی هەڵوێستی تووند بەرامبەر بە‌غدا کراوە تاوەکو دەگاتە کشانەوە لە پرۆسەی سیاسیی عێراق، ئەگەر لە سەرەتای ئەمساڵ کێشەی مووچە چارەسەر نەکرێت.

 

چیرۆکی سەرەکی: ئەمڕۆ چوارشەممە ئەنجوومەنی وەزیرانی هەرێمی کوردستان بەسەرپەرشتی مەسرور بارزانی و ئامادەبوونی قوباد تاڵەبانی لەبارەی مووچە و پرسە داراییەکان کۆبووەوە.

 

زانیاریی تایبەت: سەرۆکوەزیران مەسرور بارزانی لە کۆبوونەوەی ئەمڕۆی ئەنجوومەنی وەزیران ڕایگەیاندووە: "ئەم ستەمەی حکومەتی عێراق لە مووچەخۆرانی کوردستانی دەکات چیتر جێگەی قبوڵ نییە، پێویستە وەکو حکومەتی هەرێمی کوردستان هەڵوێست و ڕێوشوێنمان هەبێت، ناکرێ ئێمە هەر داواکاری جێبەجێ بکەین و بەغداش خۆی لە مافە دەستوورییەکان بدزێتەوە، ناکرێت ساڵی 2025 بە هەمان کێشەکانی ساڵی ڕابردوو سەرقاڵمان بکەن و مافەکانمان نەدەن". بۆیە مەسرور بارزانی پێشنیازی چەند ڕێوشوێنێکی کردووە بەرامبەر بەغدا بگیرێنەبەر:

یەکەم: بانگکردنی وەزیرانی کورد لە حکومەتی عێراق و سەرۆک فراکسیۆنە کوردستانییەکان لە پەرلەمانی عێراق بۆ هەولێر، ڕوونکردنەوەی پێویستیان لەسەر کێشەکان پێبدرێت، دووپاتکردنەوەی ئەوەی هەرێمی کوردستان پابەند بووە و هەموو مەرج و داواکارییەکانی حکومەتی عێراقی جێبەجێ کردوون.

 

دووەم: کۆمەڵگەی نێودەوڵەتی، واتە باڵیۆزخانە و کونسوڵخانە و نوێنەرایەتیی دیبلۆماسی لە هەولێر و بەغدا ئاگاداربکرێنەوە لەسەر پێشێلکردنی مافە دەستوورییەکانی هەرێمی کوردسستان لەلایەن حکومەتی فیدراڵی عێراق.

 

سێیەم: دوای ئاگادارکردنەوەی باڵیۆزخانە و کونسوڵخانەکان، شاندێکی هەرێمی کوردستان بچێتە بەغدا، هەموو شتێکیان بۆ ڕوون بکاتەوە و دوایین قسەیان لێ وەربگرێت، چۆن کێشەکان لەمساڵدا چارەسەر بکەن؟ ئەگەر کێشەکان وەکو ساڵی ڕابردوو بەردەوامی پێبدەن، ئەوا هەرێمی کوردستان هەڵوێستی تووند وەردەگرێت.

 

چوارەم: یەکێک لە بژاردە هەرە بەهێزەکان، ئەگەر لە سەرەتای ئەمساڵ کێشەکان چارەسەر نەکرێن بەتایبەت پرسی مووچە، بریتییە لە کشانەوە لە بەغدا و تێکدانی پرۆسەی سیاسی عێراق.

لەلایەکی دیکەوە: قوباد تاڵەبانی، جێگری سەرۆکوەزیران قسەی کردووە و  گوتوویەتی: پشتیوانی ئەو هەڵوێستە دەکەین و پێویستە ئەم ڕێوشوێنانە بگیرێنەر، دواتر بە ڕاوێژ بڕیاری پێویستیان لەبارەوە دەدەین".