دوای هۆشدارییەکەی وەزارەتی دارایی؛ خانەنشینانی سلێمانی فۆرمی 'هەژماری من' پڕدەکەنەوە

ئاڤا نیوز

 

نزیکەی 50 هەزار خانەنشین لە سلێمانی ئەم مانگە و مانگی داهاتوو کێشەی مووچەیان بۆ دروست دەبێت، ئەگەر فۆرمی هەژماری من پڕنەکەنەوە و کارتەکانیان وەرنەگرنەوە.

 

گرفتەكە چییە: نزیكەی 10%ـی فەرمانبەران و خانەنشینانی هەرێمی كوردستان تا ئێستا مامەڵەی بەبانكیركردنی مووچەكانیان دەستپێنەكردووە، واتە فۆرمی 'هەژماری من' ـیان پڕنەكردووەتەوە. ئەوەش لەكاتێكدا وەزارەتی دارایی عێراق بڕیاری داوە؛ هەر فەرمانبەر و خانەنشین و مووچەخۆرێكی هەرێمی كوردستان تا كۆتایی ئەمساڵ هەژماری بانكی نەبێت، لە بەغداوە مووچەكەی ڕادەگرێت و بۆی خەرج ناكرێت.

بۆ چارەسەرکردنی کێشەکە، خانەنشینانی سلێمانی دەستیان کردوە بە پرکردنەوەی فۆرمی هەژماری من تاوەکو بتوانن موچەی مانگی 9 وەربگرن. 

لێدوانیف فەرمی؛ شۆخان عومەر، بەڕێوەبەری بانکی مەڵکەندی - لقی سلێمانی بە ئاڤای گوت، لە چوار لقی بانکی مەڵکەندی و بانکی تانجەرۆ دەستیان بە پرکردنەوەی فۆرمی هەژماری من و پێدانەوەی کارتەکان بە خانەنشینان کردووە، چونکە دوای هۆشدارییەکەی وەزارەتی دارایی، خانەنشینان و فەرمانبەران بە لێشاو سەردانیان دەکەن.

وەزارەتی دارایی سوورە لەسەر ئەوەی هەر فەرمانبەر و خانەنشێنێک فۆرمی هەژماری من پڕنەکاتەوە مووچەی مانگی نۆی پێنادرێت، هەر مووچەخۆرێکیش کارتەکەی تەواو بووبێت، مانگی 10 مووچەی بە کاش پێنادرێت و بۆی دەخرێتە سەر هەژماری من.

لەلایەکی دیکە: شۆخان عومەر دەڵێت، هەفتەی داهاتوو کە مووچە هات و دەست بە دابەشكردنی کرا، ئەگەر هەر مووچەخۆرێک مووچەکەی ڕاگیرابوو، هەمان ڕۆژ کە دەچێت مووچە وەربگرێت، دەتوانێت فۆرمەکە پڕبکاتەوە، کە فۆرمەکەت پڕکردەوە ئیتر مووچەت پێ دەدرێت.

هاوکات: ژیان سابر ، بەرێوبەری گشتی خانەنشینی سلێمانی بە ئاڤای گوتووە: لە سلێمانی زیاتر لە 55 هەزار خانەنشین هەیە، ژمارەیەکی کەمیان فۆرمی هەژماری منیان پرکردۆتەوە.

لەو ژمارەیەش تەنیا 280 خانەنشین کارتەکانیان بۆ گەراوەتەوە، بۆیە کار بۆ ئەوە دەکەین خانەنشینان بتوانن بە ئاسانی فۆرمەکەیان پر بکەنەوە.

زانیاریی ئاڤا؛ بەپێ زانیاریەکانی ئاڤا، تەنیا دوای بڵاوکردنەوەی هۆشدارییەکە، لە سلێمانی دا زیاتر لە سێ هەزار و 500 فۆرمی هەژماری من بۆ خانەنشینان پر کراونەتەوە، ئەمە جگە لەو فۆرمانەی دراوەتەوە خانەنشینان هێشتا نەگەراونەتەوە دەست تیمی هەژماری من لە بانکەکاندا.