شاندێک بۆ چارەنووسی مووچەی مانگەکانی 11 و 12 دەچێتە بەغدا

ئاڤا نیوز

هەفتەی داهاتوو شاندێکی باڵای حکومەتی کوردستان بۆ یەکلاکردنەوەی  پرسی مووچەی مانگەکانی 11 و 12 دەچێتە بەغدا، ئەمەش دوای کۆبوونەوەی نێوان سەرۆکوەزیرانی هەرێمی کوردستان و سەرۆکوەزیرانی عێراق دێت.

چیرۆکی سەرەکی: بە مەبەستی دۆزینەوەی ڕێگاچارەیەک بۆ خەرجکردنی مووچەی مانگەکانی 11 و 12ـی مووچەخۆرانی هەرێمی کوردستان، هەفتەی داهاتوو شاندێکی هەولێر سەردانی بەغدا دەکات.

زانیاریی بەدەستهاتوو: بەپێی زانیارییەکان، مەسرور بارزانی لەسەر هێڵە و سوورە لەسەر ئەوەی "نابێت هیچ مووچەیەک بفەوتێت" و دەبێت ڕێگەچارەیەک بۆ دابینکردنی ئەو دوو مووچەیەی مووچەخۆران بدۆزرێتەوە.

گرفتەکە چیە: گرفتێکی دارایی لە نێوان هەولێر و بەغدا دروست بووە لەسەر خەرجکردنی مووچەی دوو مانگی کۆتایی ئەمساڵ. حکومەتی عێراق دەڵێت، حکومەتی هەرێمی کوردستان لە بودجەی 2024ـدا، پشکی خۆی بە زیادەوە وەرگرتووە و بۆ ئەو دوو مانگە پارەی پێویستی لە بەشە بودجەدا نەماوە، لە بەرامبەردا، حکومەتی هەرێمی کوردستان دەڵێت، شایستە داراییەکانی خۆیان بە تەواوی وەرنەگرتووە. 

چارەسەرەکان: دوێنێ مەسرور بارزانی، سەرۆکوەزیرانی هەرێمی کوردستان و محەممەد شیاع سوودانی، سەرۆکوەزیرانی عێراق گفتوگۆیان کردووە. سوودانی بەڵێنی داوە هەوڵبدات چارەسەرێک بدۆزێتەوە، بەڵام ڕەنگە ناردنی ئەو پارەیە بکەوێتە ساڵی 2026.

هەنگاوی داهاتوو: بۆ بڕینی بیانووەکان و دۆزینەوەی چارەسەری خێرا، بڕیارە هەفتەی داهاتوو شاندێکی باڵای حکومەتی هەرێم سەردانی بەغدا بکات. شاندەکە پێکهاتووە لە د. ئومێد سەباح، سەرۆکی دیوانی ئەنجوومەنی وەزیران، د. ئامانج ڕەحیم، سکرتێری ئەنجوومەنی وەزیران، د. عەبدولحەکیم خەسرۆ، سەرۆکی فەرمانگەی هەماهەنگی و بەدواداچوون، بە یاوەری نوێنەری وەزارەتی دارایی. شاندەکە لەگەڵ وەزارەتی دارایی عێراق و بەرپرسانی ئەنجوومەنی وەزیران کۆدەبنەوە.