هاوپەیمانیی سیادە بۆ ئاڤا: هێزە سوننییەکان داواکاری ستراتیژییان بۆ بەشداریکردن لە حکومەت هەیە

ئاڤا نیوز

هاوپەیمانیی سیادە ڕایدەگەیێنێت، هێزە سوننییەکان ژمارەیەک داواکاریی ستراتیژییان هەیە بۆ بەشداریکردنێکی کارا لە حکومەتی نوێی عێراقدا. سەرکردەیەکی هاوپەیمانییەکە دووپاتی دەکاتەوە کە پشتیوانیکردن لە حکومەتی داهاتوو بەستراوەتەوە بە جێبەجێکردنی ئەم داواکارییانەی کە بەرژەوەندییەکانی پێکهاتەی سوننە دەگرێتەوە.

 

لێدوانی فەرمی: سەڵاح کوبەیسی، سەرکردە لە هاوپەیمانیی سیادە، بە ئاڤا میدیای ڕاگەیاند، "هێزە سوننییەکان مەرجیان داناوە بۆ بەشداریکردن لە حکومەتی نوێدا، پشتیوانیکردنی ئەم حکومەتە بەستراوەتەوە بە جێبەجێکردنی کۆمەڵێک داواکاریی ستراتیژی کە ڕەنگدانەوەی بەرژەوەندییەکانی گەلی سوننەیە".

 

زانیاریی زیاتر: بە گوتەی کوبەیسی "ئێمە ئامادەین بۆ پشتیوانیکردن لە حکومەتی نوێ و بەشداریکردنێکی کارا تێیدا، بەڵام ئەمە تەنیا دوای دڵنیابوونەوە لە پابەندبوونی حکومەت دەبێت بە دڵنیاییدان لە نوێنەرایەتیی دادپەروەرانەی پێکهاتە سوننییەکان لە پۆستە سەرکردایەتییەکان و دابەشکردنی هاوسەنگیی سەرچاوەکان لە نێوان پارێزگاکاندا."

 

پەیامی فەرمی: کوبەیسی جەختی لەسەر هەندێک مەرجی دیاریکراو کردەوە کە دەبێت جێبەجێ بکرێن، لەوانە: ڕێزگرتن لە ڕێککەوتنەکانی پێشووی نێوان هێزە سیاسییەکان، دەستپێکردنی پڕۆژەی گەشەپێدان لە ناوچە سوننییەکان، پاراستنی ئاسایش و سەقامگیری و بەرەنگاربوونەوەی ڕاستەقینەی گەندەڵی، لەگەڵ گەڕاندنەوەی ئاوارەکان و کۆتاییهێنان بەم دۆسیە مرۆییە.