ئاژانسێکی جیهانی: عێراق ڕووبەڕووی ئاستەنگیی گەورەی ئابووری دەبێتەوە

ئاڤا نیوز

 

ئاژانسی (مودیزی) بۆ پۆلێنکردنی قەرز ڕایدەگەیێنێت، عێراق ڕووبەڕووی ئاستەنگیی گەورەی ئابووری دەبێتەوە، بەتایبەتی بەهۆی لاوازی دامەزراوەکان، حوکمڕانی و پشت بەستنی تەواوی دارایی گشتی بە داهاتەکانی نەوتەوە.

 

وێنە گەورەکە: عێراق لەسەر بناغەیەکی دارایی ناسەقامگیر وەستاوە، کە بەتەواوی پشت بە داهاتی نەوت دەبەستێت. ئەم دۆخە داراییە، ئەگەر چارەسەر نەکرێت، لە داهاتوودا کێشەی گەورەتری دارایی و ئابووری بۆ وڵاتەکە دروست دەکات.

بڵاوکراوەی فەرمی: مودیزی لە ڕاپۆرتێکیدا ئاماژەی بەوەداوە، "پشت بەستنی زۆری عێراق بە سێکتەری هایدرۆکاربۆن (کە نزیکەی 90%ی داهاتی حکومەت دابین دەکات) وای لێدەکات لە دۆخێکی ناسەقامگیردا بێت لە بەرامبەر گۆڕانکارییەکانی نرخی نەوت." ئاژانسەکە پێشبینی دەکات نرخی نەوت لە 2026-2027 دابەزێت، کە فشارێکی زیاتر لەسەر بودجە دروست دەکات.

 

ئەوەی پێویستە بیزانیت: ڕاپۆرتەکە دەڵێت، دۆخی سیاسی دابەشبوو پاش هەڵبژاردنەکانی تشرینی دووەمی 2025 لەوانەیە سیناریۆی دواکەوتنی پێکهێنانی حکومەت و پەسەندکردنی بودجە دووبارە بکاتەوە، وەک ئەوەی پاش هەڵبژاردنەکانی 2021 ڕووی دا. ئەمەش واتە عێراق ڕووبەڕووی بۆشاییەکی دارایی ئەگەری دەبێتەوە.

 

ئەوەی پێشبینی دەکرێت: مودیزی پێشبینی کردووە کە کورتهێنانی دارایی لە 2025دا نزیکەی 7.4% و لە 2026-2027دا نزیکەی 9%ی کۆی بەرهەمی ناوخۆیی بێت، ئەمەش بەهۆی دابەزینی نرخی نەوت و بەرزبوونەوەی خەرجییەکانەوە.

 

ئەوەی لەبارەیەوە دەگوترێت: شەوی ڕابردوو، نووری مالیکی لە چاوپێکەوتنێکی تەلەڤزیۆنیدا ڕایگەیاند، "کێشەی ئابووری گەورەترین کێشەی حکومەتی داهاتوو دەبێت".

 

لەلایەکی دیکەوە: دوای دەنگۆی وەستانی شەڕی نێوان ئۆکرانیا و ڕووسیا، نرخی نەوت لە بازاڕەکانی جیهان بۆ 63 دۆلار دابەزی و نرخی نەوتی عێراقیش بۆ 58 دۆلار دابەزی، ئەمەش مەترسی زۆر لەسەر بودجەی عێراق دروست دەکات.