زانکۆی سەڵاحەددین خولی دەرچووانی ئەمساڵ بەشێوەیەکی جیاواز بەڕێوە دەبات

ئاڤا نیوز

بڕیارە ئەم هەفتەیە زانکۆی سەڵاحەددین، خولی 44ـەمینی دەرچووانی بەشێوەیەکی جیاواز بەڕێوە ببات. ئەمساڵ دەرچووانی پێنج ساڵی خوێندنی ماستەر و دکتۆرا بەشداری لە ئاهەنگی دەرچووان دەکەن.

وێنە گەورەکە: ساڵانە زانکۆی سەڵاحەددین لە یاریگای فرەنسۆ هەریری گەورەترین ئاهەنگی دەرچوون بەڕێوە دەبات. لە ئاهەنگەکە بڕوانامەی دەرچوونی پلەی بەکالۆریۆس بە قوتابییان دەدرێت.

لێدوانی فەرمی: سامان عەبدوڵڵا، بەڕێوەبەری ڕاگەیاندنی زانکۆی سەڵاحەددین بە ئاڤا میدیای گوت، ڕۆژی یەکشەممەی ئەم هەفتەیە کاتژمێر 4ـی ئێوارە لە یاریگای فرەنسۆ هەریری بە ئامادەبوونی سەرۆکوەزیران مەسرور بارزانی ئاهەنگی دەرچووانی خولی 44ـی زانکۆی سەڵاحەددین بەڕێوەدەچێت.

بەڕێوەبەری ڕاگەیاندنی زانکۆی سەڵاحەددین دەشڵێت: بۆ ئەمساڵ پێنج هەزار و 32 قوتابی بڕوانامەی دەرچوون وەردەگرن، هاوکات هەزار و 950 دەرچووی خوێندنی ماستەر و دکتۆرا کە لە ساڵانی 2020 بۆ 2025 دەرچوون بەشداری لەم ئاهەنگە دەکەن. هاوکات وەک پاڵپشتی بۆ دەرچووان، لە تاوەری زانیاری کە بەرزترین تاوەری هەولێرە پەیامی پیرۆزبایی زانکۆی سەڵاحەددین بۆ قوتابییان دەنووسرێت.

 

باکگراوند: زانکۆی سەڵاحەددین بە یەکەمین زانکۆی باشووری کوردستان دادەنرێت، لە ساڵی 1968 لە سلێمانی دامەزرا و دواتر لە ساڵی 1981 گواسترایەوە هەولێر. ئێستا ئەو زانکۆیە لە 17 کۆلێژ و 90 بەشی ئەکادیمی پێکدێت.