پسپۆڕێکی ئابووری هۆشداری دەدات: عێراق ڕووبەڕووی "شۆکێکی ئابووری" دەبێتەوە

ئاڤا نیوز

پسپۆڕێکی ئابووری ڕایدەگەیێنێت، عێراق بەرەو "شۆکێکی ئابووری و دارایی خێرا" دەڕوات کە ملیۆنان کەس ناچار دەکات ڕووبەڕووی واقیعێک ببنەوە کە هێشتا ئامادەکاری بۆ نەکراوە. هاوکات هۆشداریی دەدات لە بەردەوامبوونی "وەهمی ئابووری" کە دەڵێت، عێراق دەتوانێت بە خۆکارانە یان بە چارەسەری ڕووکەش قەیرانەکانی تێپەڕێنێت.

لێدوانی فەرمی: مەنار عوبەیدی، پسپۆڕی ئابووری، لە لێدوانێکدا بە ئاڤا میدیای ڕاگەیاند، "زۆر مەترسیدارە کە هەندێک کەس بەردەوام بن لە دروستکردنی 'وەهمی ئابووری' کە دەڵێت عێراق توانای ئەوەی هەیە بە شێوەیەکی ئۆتۆماتیکی یان لە ڕێگەی چارەسەری ڕووکەشەوە بەسەر قەیرانەکانیدا زاڵ بێت".

لەهەمان کاتدا: بەگوتەی عوبەیدی، بڕیاردەرانی ئابووری دوو ڕێگەیان لەبەردەمدایە: یان "ڕووبەڕووبوونەوەی واقیعەکە بە گۆڕانکاریی بوێرانە" کە کەمکردنەوەی خەرجی گشتی و باشترکردنی پشتیوانییەکان دەگرێتەوە، یان "دواخستن" بە زیادکردنی قەرز یان چاپکردنی پارە، کە کێشەکە قووڵتر دەکاتەوە.

زانیاریی زیاتر: عوبەیدی ڕوونی دەکاتەوە، هەندێک دەڵێن 15 ساڵە باسی قەیرانێک دەکەیت، بەڵام ڕووینەداوە!" ڕوونیشیکردەوە، "ئەم کەسانە لەوە تێناگەن کە چەمکی قەیران تەنیا بە وادەی پێدانی مووچە سنووردار نییە، قەیرانی ڕاستەقینە ئەوەیە: داڕمانی سیستمی تەندروستی، دابەزینی کوالیتی خوێندن، تێکچوونی ئاسایشی ئاو و خۆراک، هەروەها کەمبوونەوەی سەرچاوە داراییەکان بەبێ دروستکردنی بژاردەی جێگرەوە، جگە لە پشتبەستنی تەواو بە دەوڵەت لە هەموو شتێکدا لە بەرامبەر نەبوونی ڕۆڵی هاووڵاتی.

مەترسییەکان: عوبەیدی جەختی لەسەر ئەوە کردەوە، عێراق نزیکەی 20 ساڵە لەناو قەیرانێکی بەردەوامدایە و هۆشداریدەدات ئەگەر بەردەوام بین لەسەر لۆژیکی دواخستن و قەرزکردن و دەرکردنی دراوی زیادە و فراوانکردنی خەرجییەکانی بەکاربەر، ئەوا کێشەکە چارەسەر ناکەین؛ بەڵکو بە سادەیی دەیگوازینەوە بۆ ساڵانی داهاتوو. چارەسەری ڕاستەقینە پێویستی بە "هەنگاوی قورس" هەیە، تەنانەت ئەگەر خەڵکیش ڕەتی بکەنەوە، چونکە چاکسازیی ڕاستەقینە بەدوای ناوبانگدا ناگەڕێت، بەڵکو بەدوای بەردەوامیدا دەگەڕێت.