گرووپە چەکدارەکانی عێراق گوشار بۆ دوورخستنەوەی سوودانی دەکەن

ئاڤا نیوز

بەپێی میدیا عەرەبییەکان، محەممەد شیاع سوودانی، سەرۆکوەزیرانی عێراق، لەلایەن باڵی سیاسیی گرووپە چەکدارەکانی عێراقەوە ڕووبەڕووی شەپۆلێکی بەهێزی گوشار بووەتەوە بە ئامانجی ڕێگریکردن لە نوێکردنەوەی ویلایەتەکەی بۆ خولێکی دیکە.

چیرۆکی سەرەکی: ڕۆژنامەی "عەرەبی جەدید" بەپشت بەستن بە چەند سەرچاوەیەکی  سیاسیی ئاگادار ئاشکرای کردووە، لەنێو هاوپەیمانی چوارچێوەی هەماهەنگی گرووپە چەکدارەکان بوونەتە بەرەیەکی فشار، بۆ لاوازکردنی شانسی سوودانی بۆ دووبارە وەرگرتنی پۆستی سەرۆکوەزیران، ئەم بۆچوونەش لەلایەن هەریەک لە نووری مالیکی، سەرۆکی هاوپەیمانی دەوڵەتی یاسا و قەیس خەزعەلی، ئەمینداری گشتی عەسائیب پشتیووانی دەکرێت.

لێدوانی فەرمی: عەلی زوبەیدی، ئەندامی چوارچێوەی هەماهەنگی ڕایگەیاند: سوودانی بۆ ویلایەتی دووەم لە دەرەوەی هاوکێشەکە دایە و لایەنە شیعەکان بەدوای جێگرەوەی دەگەڕێن، چونکە ناکۆکییەکانی لەگەڵ دەوڵەتی یاسا لەلایەک و لەگەڵ ڕێکخراوی بەدر و عەسائیب لەلایەکی دیکەوە، ئەو قەناعەتەی دروستکردووە کە مانەوەی سودانی خزمەت بە یەکڕیزی شیعە وەک پێکهاتە ناکات، بەڵام ئەگەری هەیە بەهۆی کورسییە پەرلەمانییەکانیەوە پۆستێکی وەزاری پێ بدرێت.

لەلایەکی دیکەوە: موهەننەد عیتابی، توێژەری سیاسی پێی وایە پرۆسەی دیاریکردنی سەرۆکوەزیرانی نوێ جگە لە کاریگەری ناوخۆیی، پابەندە بە لایەنی دەرەکیشەوە، بۆیە ناتوانرێت سەرۆکوەزیرانێک تەنیا لە سەر ڕەزامەندی گرووپە چەکدارەکانیان ئەو هێزانە دیاری بکرێت کە لە هەمان کاتدا کاری سیاسی و چەکداری دەکەن.