وتەبێژی حکومەت لەبارەی مووچەی مانگی 12 ڕوونکردنەوە دەدات

ئاڤا نیوز

 

وتەبیژی حکومەتی هەرێمی کوردستان ڕایدەگەیێنێت، حکومەتی فیدڕاڵی هەمیشە بیانووی نوێی هەیە و عێراق پابەندی بڕیاری دادگای فیدڕالی نەبووە بۆ ڕەوانەکردنی مووچە.

 

وێنە گەورەکە: لە کاتێکدا کە حکومەتی هەرێمی کوردستان هەموو داواکارییەکانی حکومەتی فیدڕاڵی جێبەجێ کردووە و هەردوولا ڕێککەوتبوون لەوەی مووچەی سێ مانگی کۆتایی ساڵی 2024 بەبێ کێشە بنێردرێت، بەڵام لە کۆی سێ ترلیۆن دینار، حکومەتی عێراق کەمتر لە دوو ترلیۆنی بۆ مووچەی فەرمانبەران ناردووە.

 

لێدوانی فەرمی: پێشەوا هەورامانی، وتەبێژی حکومەتی هەرێمی کوردستان لە گەشتی هەواڵەکانی کاتژمێر 7ـی ئاڤا میدیا ڕایگەیاند: "دوایین قسەی وەزیری دارایی عێراق بۆ شاندی حکومەتی هەرێمی کوردستان ئەوەبووە کە مووچەی مانگی 12ـی فەرمانبەرانی هەرێمی کوردستان ڕەوانە دەکەن".

 

ئەوەی پێویستە بیزانیت: هەرێمی کوردستان سەرجەم پابەندییەکانی خۆی بەرامبەر حکومەتی عێراق جێبەجێکردووە، بەڵام بەغدا بەردەوام بە دوای بیانووی نوێدا دەگەڕێت، پێشتر دەیانگوت نەوت ڕادەست ناکەن و لیستی مووچەی کێشەی تیایە، ئێستا سەرجەم مووچەخۆران بایۆمەتریان بۆ کراوە و لیستی مووچەی خاوێن کراوەتەوە.

 
لەلایەکی دیکە: حكومەتی عێراق تەنیا 7%ی بودجەی بۆ هەرێمی كوردستان ناردووە، ساڵی ڕابردوو داهاتی ناوخۆ سێ ترلیۆن و 600 ملیار دینار بووە، نزیکەی 960 ملیار دینار بۆ کورتهێنانی مووچەی مووچەخۆران بەکارهێنراوە، هاوکات 11 مووچە بەسەر فەرمانبەرانی هەرێمی کوردستاندا دابەشکراوە.