سەرۆک بارزانی: پابەندبوون بە دەستوور تاكە ڕێگەچارەی كێشەكانی نێوان هەولێر و بەغدایە

ئاڤا نیوز

 

سەرۆک بارزانی لە میانی کۆبوونەوەی لەگەڵ سەرۆکی ئەرمینیا جەختی کردەوە کە پابەندبوون بە دەستوور تاكە ڕێگەی چارەسەریی كێشەكانی نێوان هەولێر و بەغدایە. 

 

وێنە گەورەکە: لە چوارچێوەی سەردانەکەی سەرۆکی ئەرمینیا بۆ هەرێمی کوردستان، ڕۆژی پێنجشەممە 29-02-2024 لە سەڵاحەددین سەرۆک مەسعود بارزانی پێشوازی لە ڤاهگن خاچاتوریان سەرۆكی ئەرمینیا كرد.

 

ڕاگەیێنراوی فەرمی: سەرۆكی ئەرمینیا ستایشی پێشكەوتن و ئارامیی هەرێمی كوردستانی كرد و ڕۆڵی سەرۆک بارزانی لە ڕەخساندنی ژینگەیەكی ئارام و پێكەوەژیانی نێوان پێكهاتەكان لە هەرێمی كوردستان و ڕووبەڕووبوونەوەی تیرۆر و توندڕۆیی بەرز نرخاند.

 

لەلایەکی دیکەوە: سەرۆک بارزانی بەگەرمی بەخێرهاتنی سەرۆكی ئەرمینیای كرد و ئاماژەی بە پەیوەندییە مێژووییەكانی نێوان گەلی كوردستان و گەلی ئەرمینیا دا و سوپاسی سەرۆک و وڵاتی ئەرمینیاشی كرد بۆ ڕێزگرتن لە مافەكانی كوردانی نیشتەجێیی وڵاتی ئەرمینیا. هەردوولاش لەسەر ئەوە هاوڕابوون كە ئاشتی تاكە ڕێگەی چارەسەركردنی گرفتەكانی گەلانی ناوچەكە و نەوەكانی داهاتووە.

 

ئەوەی پێویستە بیزانیت: لە کۆبوونەوەکە سەرۆک بارزانی لەبارەی پەیوەندییەکانی هەولێر و بەغدا دووپاتی کردەوە کە پابەندبوون بە دەستوور تاكە ڕێگەی چارەسەریی كێشەكانی نێوان هەرێمی كوردستان و حكوومەتی عێراقی فیدراڵە.

 

بابەتی ستراتیژی: لە بەشێكی دیکەی ئەو دیدارەدا جەخت لە قووڵكردنی پەیوەندییە بازرگانییەكانی نێوان هەرێمی كوردستان و وڵاتی ئەرمینیا كرایەوە.