سەرۆککۆماری نوێی لوبنان هەڵدەبژێردرێت

ئاڤا نیوز 

 

زیاتر لە دوو ساڵە لوبنان بەبێ سەرۆککۆمارە و بڕیارە ئەمڕۆ ئەنجوومەنی نوێنەرانی وڵاتەکە سەرۆککۆماری نوێ هەڵبژێرێت. 

 

وێنە گەورەکە: دوای دوو ساڵ لە بۆشایی سیاسی لە لوبنان و دووچارهاتنی بە قەیرانی ئابووری و ‌هێرشە بەردەوامەکانی ئیسرائیل بۆ ناوچە جیاجیاکانی باشووری لوبنان، دواجار کۆبوونەوەی پەرلەمانی لوبنان بۆ هەڵبژاردنی سەرۆکی وڵات دەستیپێکرد و سەرۆککۆماری نوێی لوبنان هەڵدەبژێرێت. 

 

زانیاریی بەدەستهاتوو: لایەنەکان لەسەر هەڵبژاردنی جەنەراڵ جۆزێف عەون، فەرماندەی سوپا ڕێککەوتوون وەک سەرۆکی داهاتووی ئەو وڵاتە، جۆزێف عەون بۆ ئەوەی ببێتە سەرۆککۆمار پێویستی بە دەنگی زیاتر لە دوو لەسەر سێی ئەنجوومەنی نوێنەران هەیە کە 128 ئەندام دەگرێتەوە. 

 

ئەمەش بزانە: بەپێی نەریتی سیاسیی لوبنان پێویستە سەرۆککۆمار مەسیحی بێت و پۆستی سەرۆکوەزیران سەر بە مەزهەبی سوننە و سەرۆکی پەرلەمانیش سەر بە مەزهەبی شیعە بێت. 

 

ئەوەی پێویستە بیزانیت: سەرۆککۆمار بۆ ماوەی شەش ساڵ لە پۆستەکەی دەمێنتەوە.