ئەمساڵ ژمارەیەکی زۆری قوتابخانە لە پارێزگای هەولێر دروستدەکرێن

ئاڤا دیجیتاڵ

 

لە کۆبوونەوەیەکدا لە پارێزگای هەولێر لەسەر راسپاردەی سەرۆکوەزیران بارزانی بڕیار لەسەر دروستکردنی زۆرترین قوتابخانە لە سنووری پارێزگای هەولێر درا. کۆبوونەوەکە ئەمڕۆ یەکشەممە 14-01-2024 بەڕێوەچوو کە ئالان حەمەسەعید، وەزیری پەروەردە، محەممەد شوکری، سەرۆکی دەستەی وەبەرهێنان و ئومێد خۆشناو، پارێزگاری هەولێر، ئامادەی بوون.

بۆچی گرنگە: لەسەر راسپاردەی سەرۆکوەزیران بارزانی، وەزارەتی پەروەردەی حکومەتی هەرێمی کوردستان بڕیاری دروستکردنی ژمارەیەکی زۆری قوتابخانە و خوێندنگەی لە سنووری پارێزگای هەولێر دەرکرد.

 

لێدوانی فەرمی: "لە کۆبوونەوەکەدا، دووپات لە ڕاسپاردەى سەرۆکى حکومەت و کاری لەپێشینەی کابینەى نۆیەمى حکومەتى هەرێمى کوردستان کرایەوە لە برەودانى زیاتر بەکەرتى پەروەردە و فێرکردن لە هەرێمى کوردستان بەگشتیى و هەولێرى پایتەخت بە تایبەتى"، ئومێد خۆشناو ئەمەی بە ئاڤا میدیا گوت.

لەلایەکی دیکەوە: لە کۆبوونەوەکەی ئەمڕۆدا دەستپێشخەرى و هەنگاوەکانى ئەو وەبەرهێنەر و خێرخوازانەش بەرز نرخێنرا کە لە ساڵانى ڕابردوودا هاوکار و یارمەتیدەر و هەماهەنگیکارى حکومەتی هەرێمی کوردستان بوون لە دروستکردنی پرۆژەی هاوبەش و دروستکردنى قوتابخانەکان. 

ژمارەکان وا دەڵێن: لە سنووری بەڕێوەبەرایەتیی گشتیی پارێزگای هەولێر، 1614 قوتابخانە و خوێندنگە هەن، 135 باخچەی ساوایان، 1157 قوتابخانەی بنەڕەتی، 117 قوتابخانەی دواناوەندی، 181 قوتابخانەی ئامادەیی، 12 قوتابخانەی فێرکردنی خێرا، 11 قوتابخانەی پیشەیی و کۆمەڵگەی پەروەردەیی هەن.

•    532 هەزار و 876 قوتابی لە سنووری بەڕێوەبەرایەتیی گشتیی پارێزگای هەولێر هەن. 
•    39 هەزار و 142 مامۆستا لە سنووری ئەو بەڕێوەبەرایەتییەن.