شکست بە هەوڵی تەقاندنەوەی مەزارگەی سەیدە زەینەب دەهێنرێت

ئاڤا نیوز

 

دەزگای هەواڵگریی سووریا شکست بە هەوڵێکی ڕێکخراوی داعش بۆ تەقاندنەوەی مەزارگەی سەیدە زەینەب لە دیمەشقی پایتەخت دەهێنێت.

 

زانیاریی بەدەستهاتوو: سەرچاوەیەک لە دەزگای هەواڵگری گشتیی سووریا به ئاژانسی سانای ڕاگەیاند: دەزگای هەواڵگریی گشتی بە هەماهەنگی لەگەڵ ئیدارەی ئاسایشی گشتی لە دەوروبەری دیمەشق سەرکەوتووبوون لە پووچەڵکردنەوەی هەوڵێکی داعش بۆ تەقاندنەوەی مەزارگەی سەیدە زەینەب لە دیمەشقی پایتەخت.

 

زانیاریی زیاتر: بە گوێرەی ئاژانسەکە "دەزگای هەواڵگریی سووریا لە میانی ئۆپەراسیۆنێکدا توانیان گومانلێکراوانی کردە تیرۆریستییەکە دەستگیر بکەن".

 

ئەوەی پێویستە بیزانیت: مەزارگەی سەیدە زەینەب، شوێنێکی پیرۆزی شیعەکانە؛ پێش ڕووخانی ڕژێمەکەی ئەسەد لە 8-12-2024، سوپای پاسدارانی ئێران و گرووپە چەکدارە شیعەکانی ئەفغانستان و پاکستان بە ناوەکانی فاتمیون و زەینەبیون بە ناوی پارێزگاریکردن لە شوێنە پیرۆزەکان لە سووریا بوون.