جەمال کۆچەر: تەیف سامی وتی هیچ بڕە پارەیەک بۆ مووچەی مانگی 12 نانێرم

ئاڤا نیوز

 

تەیف سامی، وەزیری دارایی عێراق لەگەڵ لیژنەی دارایی پەرلەمان کۆبووەوە و پێی گوتوون "ئەو بڕەی بۆ مووچەی مانگانەی مووچەخۆرانی هەرێمی کوردستان دانراوە هەموویمان خەرجکردووە و هیچ بڕێک نەماوە بینێرین". دڵنیایشیدا لەوەی مووچەی ساڵی 2025ـی مووچەخۆران گەرەنتی کراوە.

 

لێدوانی فەرمی: د. جەمال کۆچەر، ئەندامی لیژنەی دارایی پەرلەمانی عێراق دەڵێت:

 

- "تەیف سامی گوتی، سەقفێک دانراوە ناتوانین لەوە زیاتر خەرج بکەین، ئەو کورتهێنانەی هەبووە لەبەر ئەوەیە لە مانگەکانی پێشوو زیاتریان خەرجکردووە، ئەگینا ئێمە پارەی هەر 12 مانگی ساڵی 2024 ـمان خەرجکردووە."

 

- د.جەمال کۆچەر جەختی لەوەکردەوە کە بەگوێرەی گوتەکانی تەیف سامی بێت، هیچ بڕە پارەیەک بۆ مانگی 12ـی ساڵی 2024 نایەت، دابینکردنی مووچەی ساڵی 2025 گرەنتی کراوە.

 

لە تەنیشت ئەم بابەتەوە: ئیخڵاس دلێمی، جێگری سەرۆكی لیژنەی دارایی لە پەرلەمانی عێراق سەبارەت بە مووچەی مانگی 12  بە ئاڤای گوت، "ئەگەر كەمێكیش دوابكەوێت، بەڵام مووچەی مانگی 12 دەدرێت و نابێت بەغدا مووچە بە كەموكوڕییەوە بنێرێت دەبێت تەواوكاری ئەو بڕەیە بنێرێت كە بۆ ئەو مانگە نێردراوە، دڵنیایی دەدەم كە مووچەی فەرمانبەرانی هەرێمی كوردستان نافەوتێت."