ئاوارەکان لە دهۆک دژی بڕیارێکی حکومەتی عێراق ناڕەزایەتی دەردەبڕن

ئاڤا نیوز

بڕیاری داخستنی نوێنەراتییەکانی عێراق لە بوارەکانی تەندروستی و پەروەردە لە هەرێمی کوردستان، ئاوارەکانی نیگەران کردووە و بەم هۆکارە لە دهۆک گردبوونەوەیەک کرا.

بۆچی گرنگە: بوونی ئەو نوێنەرایەتیانە لە هەرێمی کوردستان هۆکارێک بوو بۆ دابینکردنی بەشێکی پێداویستییە تەندروستی و پەروەردەییەکان بۆ ئاوارەکان.

لێدوانی فەرمی: نەسر دهۆکی، بەرپرسی نوێنەرایەتیی پەروەردەی عێراق لە دهۆک بە ئاڤا نیوزی گوت، کەسوکاری قوتابیان و مامۆستایانی خوێندنی عەرەبی لە دهۆک دژ بە بڕیاری حکومەتی عێراق لەبارەی داخستنی قوتابخانەکانی زمانی عەرەبی لە بەردەم نوێنەرایەتی پەروەردەی عێراق لەو پارێزگایە گردبوونەوە.

لەلایەکی دیکەوە: نەبراس عەبدوڵا، مامۆستای خوێندنی زمانی عەرەبی بە ئاڤا نیوزی گوت، بڕیارەکە هەڵەیە، لەکاتێکدا هێشتا کەیسی ئاوارەکان دانەخراوە و خەڵک نەگەڕاوەتەوە شوێنەکانیان، ئەمەش کاریگەری زۆری دەبێت لەسەریان.

ئەوەی پێویستە بیزانیت: دوای هێرشی داعش لە ساڵی 2014، ناوەندەکانی خوێندنی عەرەبی بۆ ئاوارەکانی پارێزگاکانی عێراق لە هەرێمی کوردستان کرانەوە، ئێستاش حکومەتی عێراق بڕیاری داوە، تاوەکو کۆتایی مانگی تەممووزی ئەمساڵ نوێنەرایەتییەکانی خۆی لە کەرتی پەروەردە و تەندروستی دابخات.

ژمارەکان وا دەڵێن: تەنها لە پارێزگای دهۆک 136 قوتابخانە و 46 هەزار و 995 قوتابی خوێندی عەرەبی هەن.