چوار بڕیار لە سەرۆکوەزیران مەسرور بارزانییەوە

ئاڤا نیوز

 

ئەمڕۆ یەکشەممە سەرۆکوەزیران مەسرور بارزانی سەرپەرشتی کۆبوونەوەیەکی تایبەت بە چارەسەرکردنی کێشەی پیسبوونی کەشوهەوای هەولێر و دهۆکی کرد و چەند بڕیارێکیش لەو بارەیەوە دران.

 

ڕاگەیێنراوی فەرمی: بەگوێرەی ڕاگەیێنراوی حکومەتی هەرێمی کوردستان، سەرۆکوەزیران مەسرور بارزانی ئاماژەی بەوەدا، پرسی ژینگەپارێزی بەشێکی گرنگی کارنامەی حکومەتە، پێویستە ئەرک و خەمی هەموومان بێت و ژینگە و سرووشتی جوانی کوردستان بە پاکی ڕابگرین.

 

زانیاریی زیاتر: لە کۆبوونەوەکەدا سەرۆکوەزیران مەسرور بارزانی ڕایگەیاندووە، "پاراستنی تەندروستی هاووڵاتییان و ژینگەی کوردستان و چارەسەرکردنی کێشەی پیسبوونی کەش و هەوا بەلای ئێمەوە زۆر گرنگە و ئەرکێکی لەپێشینەی حکومەتە". لەوبارەیەوە لایەنە پەیوەندیدارەکانی ڕاسپارد، ڕێوشوێنی پێویست بۆ ڕێگریکردن لەو هۆکارانەی دەبنە هۆی پیسبوونی هەوا و ژینگە و سزادانی سەرپێچیکاران بگرنەبەر.

 

ئەوەی پێویستە بیزانیت: لە کۆبوونەوەکەدا چوار بڕیاری گرنگ دران:

 

یەکەم: لە ئەمڕۆوە هەر پاڵاوگەیەک، یان هەر کارگەیەک کە لە دەرەوەی مەرج و ڕێنماییەکان کار بکات و ببێتە هۆی پیسبوونی ژینگە، ڕێکاری یاسایی بەرامبەر دەگیرێتەبەر.

دووەم: ڕێگە لە هەر پاڵاوگەیەک یان هەر کەس و لایەنێک دەگیرێت کە سووتەمەنی پیسی ئۆتۆمبێل بەرهەمدەێنێت یان بە قاچاخ دەیهێنێت و زیانی تەندروستی هەیە. هەروەها دەبێت سنوورێک بۆ سووتانی گازی هاوەڵ (الغاز المصاحب) لە کێڵگە نەوتییەکان دابنرێت.

سێیەم: دەبێت خاوەنی مۆلیدەکانی کارەبا، پابەندی ڕێنماییەکانی حکومەت بن، فیلتەریان بۆ دەنگ و پیسی هەبێت، هەر کەسێک سەرپێچی بکات ڕێکاری یاسایی بەرامبەر دەگیرێتەبەر.

چوارەم: ڕێگری لە بەکارهێنانی ئاوی پیس و ئاوەڕۆکان بکرێت کە بۆ ئاودانی سەوزە و ئاودێری بەکاردەهێنرێت.