ئاڤا بەدواداچوون بۆ فێڵی تیکتۆکچییەک دەکات

ئاڤا نیوز

 

کەسێک لە تیکتۆک بەساختە ڕیکلام بۆ دامەزراندنی خەڵک لە پاسەوانی سنوور دەکات و لەبەرامبەر دامەزراندن و  ڕاییکردنی مامەڵەکان داوای پارەی دەکات. ئاڤا بە دواداچوون بۆ ئەم بابەتە دەکات.

 

وێنە گەورەکە: گەنجێکی کورد لە ڕێگەی تۆڕی کۆمەڵایەتی تیکتۆک ڕێکلامێک دەبینێ بۆ دامەزراندن لە پاسەوانی سنوور، دوای گفتوگۆ لەگەڵ خاوەنی ڕێکلامەکە، داوای پارەی لێدەکرێت بۆ جێبەکردنی کارەکە، گەنجەکە پارەی بۆ دەنێرێت، بەڵام دواتر دەردەکەوێت کارەکە ساختەیە و فێلکردنە.

چیرۆکی سەرەکی: ئەم گەنجە لە ڕێگەی نامەوە قسە لەگەڵ ئەو ئەکاونتە ئەکات کە خۆی ناو ناوە ڕائید ئەرکان، ئەویش داوای ناسنامە و کارتی نیشتمانی و وێنەی لێ دەکات، گەنجەکەش هەموو پێداویستیەکانی بۆ دەنێرێت، دواتر ڕائید ئەرکان داوای 300 هەزاری لێ دەکات بۆ ڕاییکردنی مامەڵەکەی، گەنجە کوردەکەش لە ڕێگەی FIB پارەکەی بۆ دەنێرێت، دوای چەند ڕۆژێک ڕائید ئەرکان دەڵێت، کارەکەت جێبەجێکرا و مانگێکی دیکە ناوت ئەگەڕێتەوە.

 

ئەوەی پێویستە بیزانیت: دوای مانگێک ڕائید ئەرکان دووبارە داوای 200 هەزار دینار لە گەنجەکە دەکات بۆ فایلەکان و خێراکردنی مامەڵەکەی، گەنجەکە ئەو پارەیەشی بۆ دەنێرێت، بەڵام مانگێک تێپەڕی و ناوی گەنجەکە نەگەڕایەوە بۆ دامەزراندن، دوایین جار گەنجەکە پەیوەندی بە ڕائید ئەرکان دەکات و سۆراخی کارەکەی لێ دەکاتەوە، ئەویش پێی دەڵێ تۆ  300 هەزاری دیکە بنێرە، ئینجا پێتدەڵێم چی لێهاتووە، لەو کاتەوە گەنجەکە هەست دەکات کە  فێڵی لێ دەکرێت و ئاڤا ئاگادار دەکاتەوە و دەڵیت با خەڵکی دیکە وەک من تێنەکەوێت.