شاندێکی هەرێمی کوردستان سەبارەت بە مووچە و بودجە سەردانی بەغدا دەکات

ئاڤا نیوز

 

سەرەڕای هاتن و چوونی بەردەوامی شاندە باڵاکان، کێشەکانی نێوان هەرێم و بەغدا تا ئێستا بە هەڵپەسێردراوی ماونەتەوە، بڕیارە بەمنزیکانە جارێکی دیکە شاندێکی باڵای هەرێمی کوردستان سەردانی بەغدا بکاتەوە.

 

وێنە گەورەکە: کێشەکانی نێوان هەولێر و بەغدا، لەوانە دابینکردنی پشکی هەرێمی کوردستان لە بودجە و دەستپێکردنەوەی هەناردەی نەوت، حکومەتی هەرێمی کوردستانی نیگەران کردووە و داواکارە لە حکومەتی فیدڕاڵی کە ساڵی 2025 تەواوکەری سیناریۆی 2024 نەبێت لەڕووی داراییەوە.

 

زانیاریی بەدەستهاتوو: بۆ ماوەی دوو ڕۆژ شاندێکی باڵای هەرێمی کوردستان، بە سەرۆکایەتی نێچیرڤان بارزانی، سەرۆکی هەرێمی کوردستان لە بەغدا بوون بۆ بەشداریکردن لە کۆبوونەوەی هاوپەیمانیی ئیدارەی دەوڵەت و چاویان بە سەرکردە باڵاکانی عێراق کەوت، مووچە و شایستە داراییەکانی هەرێمی کوردستان مژاری گەرمی گفتوگۆکانیان بوو.

 

لێدوانی فەرمی: دڵشاد شەهاب، وتەبێژی سەرۆکایەتی هەرێمی کوردستان لە کۆنگرەیەکی ڕۆژنامەوانیدا ڕایگەیاند، "سەرۆکی هەرێمی کوردستان لە بەغدا بەڕوونی ئەوەی بۆ لایەنەکان و بەتایبەت سوودانی سەرۆکوەزیرانی عێراق خستەڕوو، کە حکومەتی هەرێمی کوردستان بە تەواوەتی ئەرکەکانی خۆی جێبەجێکردووە لەژێر سایەی بڕیار، یاسا و ڕێککەوتنەکان."

 

زانیاریی زیاتر: بەگوتەی وتەبێژی سەرۆکایەتی هەرێمی کوردستان هەردوولا ڕێککەوتوون لەسەر ئەوەی لە ئایندەیەکی نزیک جارێکی تر شاندێکی حکومەتی هەرێمی کوردستان سەردانی بەغدا بکەن، بەمەبەستی گفتوگۆ لەسەر کێشە هەڵپەسێردراوەکانی نێوانیان.